• Evenementen
  • Webcam
  • Evenementen
  • Webcam

Schnèè, hôôlt er rekkening met

Tien centimeter schnèè, ha ‘k in mien achterheufd. Het wördt tied dà ‘k de vèugeltjes is een betje biej vôôre. Joa het is wintertied. Ne grôôt’n witt’n reiger daalt neer in de wèire. Een paar pötjes pindakèèze met bosbess’n, nen emmer vol vetböllekes, ne zak zunnebloompitt’n en ne buul zoolt. Zo, loat noe de winter mà kômm’n. Met völle gedeuld hè ‘k alles vuur ’t huus neer ezat, zôdà ‘k ’t vanuut ’n stool môôi kan bekiek’n. Ik misse de merels, zôl der dan toch ne zeekte wèè? De vink’n bint veerweg in oavertal. Veerder vlug ter vanalles biej ôôns langs het raam en neet àllèène vleeg’n. Twei eekhoorns hebt bezit enömm’n van het vèugelhuuske, zelfs het roodborsje blif veilig op ofstàànd. De meez’n vleegt of en an tut vlak vuur ’t raam. Dan zee ‘k ter in één kèèr eene, den ‘k neet good thuus kan ebreng’n. Èèrs dèènk ik, de gekraagde roodstaart, mà biej neuider inzeen möt het hoaste wal ne keep wèè. Ho, ne torteldoeve, het blif een môôi kiekspel en ja heur, doar heij’m, de bôônte spechte, hij dut zich te good an de bosbess’n. Woer blif die tien centimeter schnèè, oh het is noe à biej e stelt noar vieve. Der goat noe à minder trein’n lôôp’n en de code is gel. Vliegtuug’n vleegt neet, hatstekke good vuur ’t milieu. In Ôôst’nriek zit ze met twei meter, hoe möt det hier toch goan as ter zôvölle schnèè kump. Möj’ oe vuurstell’n drei wekke gen treinverkèèr. ’n Bèusebarg of e slött’n van de buut’nwereld. Van de lèu uut ’n barg heiw we twei wekke làànk niks meer eheurt. Het elektrisch is kapot. Van armood heiw we de gaskachel ôônder de schorsteen weg ehaalt en stokke wiej het leste betje hoolt mar op, um een klein betje warm te bliem’n. Gelukkig köw we wat leen’n biej de buur’n. De waterleiding is al een dag of wat bevreuir’n en ôk de WC köw we neet meer duurtrekk’n, kortumme het is één en al armood. Het lik oaverdrèèm, toch lig de tied, daj’ met disse probleem’n op ezadelt wörd’n nog neet zô veer achter ôôns. Het is wal is good te bedèènk’n, hoe good ow w’t àmoa hebt. Zelfs an ôônze vèugeltjes wördt in de wintertied andach eschunk’n. Nog altied gen schnèè, zöl ’t er langs hen trekk’n, zôl alle drôkte vuur niks weer ’n ewes? Gedeuld, doar zal ech wal een betje schnèè kômm’n, geniet er van, verget de vèugeltjes neet en det zoolt is um te strèui’n tèèg’n de gladdighèid. Schnèè, hôôlt er rekkening met.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.