• Evenementen
  • Verenigingen
  • Bedrijven
  • Webcam
  • Evenementen
  • Verenigingen
  • Bedrijven
  • Webcam

Riess’n hef wier e wunn’n

De vergadering in het plat had neet völle um ’t lief. Det kôn ôk neet ààns. De börgemèister was ter neet. Wat hà ‘k ‘m geerne plat heur’n proat’n. Jammer, mà hij had an Gradus Kreijkes ne goei’n vervanger. Hij was zwat ’n eenigsten den an ’t woord is e wes en dus krèèg hij van de jury de platproaterspries. De Hoolter hadd’n wèinig in te breng’n en ôk het Limburgs van De la Haye blèèf achterwèège. Het belangriekste agendapunt, het vaste stell’n van het Kolplan, det nog vuur vèurwark had könn’n zörg’n, wörd’n duur e schèum’n noar ne volgende vergadering. Zie war’n ’t nog neet met mekaar eens, dus doar komt ze later op trugge.

Wiet ’t bedach hef, hef ’t bedach, mà het is lang elèène, dèw we zun ne goei’n één april bak hebt e had. Nee, neet den van het kultuurhuusplein, det lag ter dikke boam’nop, mà den van het Nationale park “Hoolterbarg”, môch ter wèè. Netuurlijk möt det bord bliem’n stoa. Het wördt tied det ze op t gemeentehuus de tekst’n an past, an het Sallààndse dialect, dan hooj’ de vrèimd’n neet noar ’n Nijverdal en Hell’ndoorn te stuur’n, mà rèègelrech noar’n Hoolterbarg. Zie hebt het in Riess’n nog altied oaver een Nationaal Park in oprichting. Met één dinge löp de gemeente vuurop, det möj’ ze noa gèèm’n. Zie hebt ’n Kol vinnig of e brökk’n en ôk het spoor van het HJ Wàànsik gebuur’n en het Zilverzàànd ligt er. Alles is kaal, doar steet gen ne bôôm meer oaverèine. Loaw we hopp’n det het gauw àmoa wier better en mèuier wördt. Aj’ der noe oaver hen riedt, kriej’ het geveul, det er ne bom op is e völl’n. Mà de èèrste nieje kavels bint verkoch, dus kan ’t vanof noe allèène mà better word’n. Woe ‘k miej ôk wier op mien gemak veule, is op ’n Beelt. De Kèune bint er wier. Het is allèène jammer det de ôôlde bàànk’n der nog neet wier stoat. Ôk oaver de pôômpe wördt geheimzinnig e doane. Het zôl môôi weer at de gemeente hier oaver noe is kloare wien zôl schèènk’n. Het bint klèine dinge, mà juus det is, vuur de gewone man, belangriek. Oh, en dan hè ‘k nog iets op de lèèver. À’k ’t good heb e heurt, wördt er an ’t èine van ’t joar wier beslist oaver het gemeentelijk niejs in de kràànte. Het zôl de politiek sier’n as ôk ôôns “Hoolt’n Extra” ne kààns krig um met te doon. Het zôl à môôi weer, allèène vuur Hoolt’n, mà wie wèèt, kan Hoolt’n Extra volgend joar ôk huus an huus word’n bezörgd in Riess’n. Riess’n zal der wal an mönn’n wenn’n, mà det môsse wiej ôk met het Riessens Niejs. Wat het ôk wördt, gen eene pertieje kan noe meer zegg’n, det ze der niks van wuss’n. As Hoolter blieve wiej goan vuur ôôns darp. Wis en waarachtig.

De Vèèrkàànte Viefkop.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.