• Leven in Holten
  • Contact
  • Leven in Holten
  • Contact

Poasvèur’n en Pisvèur’n

6
GEDEELD

Oaveral in Twèènte en ’n Achterhook zeej’ Poasbult’n de grôônd uut kômm’n. Vaake bint ze beschèid’n van umvàànk. Näns bint ze zô massaal, grôôt en môôi, as in ôôns Sallààndse Hoolt’n. Àj’ der langs riedt zeej’ onmeunige stapels hoolt ligg’n. Het zal nog hèèl wat zwèètdröpppeltjes kost’n um al die täkke op de boake te krieg’n. Deepe respekt vuur al det geëuis van die boakenbouwers. Netuurlijk het geet um de wille en de kammeroadschap, mà duur de competitie, ontstoane in de joar’n zestig van de vuurige eeuw, bint de vèur’n in Hoolt’n e blèèm’n en alsmà grötter en mèuier e wörd’n. Volgens miej wördt er her en der ôk biej e waakt, want ie zeet ’s oamds laate nog lech bràànd’n in de keet’n. Det is ôk wà nèurig, want doar bint, in vroggere tied’n en zelfs van ’t joar à, poasvèur’n te vrog in de bràànd e goane. À vuur de Karsdaag’n zag ie het èèrste hoolt ligg’n op het Hoolterbrook en noe, disse daag’n, zeej’, zo hèinig an, de kègelvorm onstoan, in de stried met Bèusebarg, um de mèuiste boake. Trouwens het kan nog wal is weer det Diekerhook met dut um die erepries. Zie hebt nog nôôit zô völle môôie dennekes e haalt as de ofgelôôp’n wekk’n. Netuurlijk goat ze der vuur um Splôô te glad of te weer, mar àj’ biej Splôô langs riedt, raak ie toch deepe ôônder ’n indruk en zeej’ det die stried nog lange neet e leup’n is. Môch Diekerhook het redd’n, dan köj’ der van op an det in Splôô de beer ech lös is. Netuurlijk, op ’n Lech’nbarg doot ze ôk met, neet met de wedstried, mà wà um de wille. Oaver een paar daag’n zal de landelijke pers en tillevisie Hoolt’n wier wèèt’n te vind’n as de belangriekste jurycommissie langs de boakes is e wes. Wie hef ’n grötst’n, wie hef ’n mèuist’n en wie geet er striek’n met de Ontvangstpries. Het schient det de boakenbouwers de règels iets hebt an e past, zôdet de boakes nog wat steiler möt weer as ààndere joar’n. Het pannekook’nmodel wördt doarduur nog wier meer noar de achtergrôônd e drukt. Zoaterdag vanof half tweie zöw we ’t wèèt’n. Gelukkig is de kuuring met ne drone noar de achtergrôônd e schèum’n. Gelukkig ja, want wat is ter noe mèuier en gezelliger as het ôôlderwetse opmett’n met lààndmettersapparatuur. In de tied van het mett’n met een lint en ne metstok wörd’n der her en der nog wal is e sjoemelt, vuural as het eeg’n volk, boam’n op de boake, het lint hantèèr’n. Poasvèurbouwers nog eene wekke en dan zee we mekaar àmoa biej Toontje, biej de priesuutreiking. Zô gauw as de prieze verdeeld bint, is Hoolt’n wier één gehèèl. Tut zô lange is het, de rest zit in het kissie, in het kissie van papier, ha-di-je-je-je-o-ha-di-jo. Geniet er van, want het blif goan um de wille en de kammeroadschap in de buurt’n. Wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.