• Leven in Holten
  • Contact
  • Leven in Holten
  • Contact

Ôôit zölt de boakes wier bràànd’n

24
GEDEELD

Poas’n steet vuur de duure. Ôk hier is de regie oaver enömm’n duur corona. Terechte netuurlijk, mà met Poas’n vuur de duure mag een ieder op ziene menèère hoppe putt’n uut de bosschôp van dit môôie biebelverhaal. Dit joar zal ààns wèèr as ààndere joar’n. Neet lekker ett’n met de hèèle femilie. Gen gezellig biej mekaa kômm’n biej den poasbult, gen kuuring’n en gen priesuutreiking met die geweldige ontlading biej Toontje. Het geveul van, wiej heurt biej Diekerhook, Splôô, Lech’nbarg, Bèuzebarg of Hoolterbrook. Het is ôôns zô mar of enömm’n duur mooder Natuur. Gen normale karkdienst’n en gen festivals, het is nen onwezelijken tied. Wiej wordt met de nèuze op de feit’n edrukt, det alles hèèl betrekkelijk is. Links en rechts um oen hen valt er slachtoffers. Ie drèègt het met oe met, mà wèèt det er, normaal in ôôns làànd ôk, alle wekke duuzenden mèèns’n van ôôns goat. Het verdreet is het hèèle joar duur met ôôns, mà disse wekk’n krig die nieje rotzeekte alle andach. Ie könt de tillevisie neet anzett’n of de narighèid vlug wier oaver ôôns hen. Vuural de euldern en de zwakkern ôônder ôôns wordt er onzeker van. Zô of en touw een greun lichtpuntje, mà meer is het nog neet. De gedacht’n blieft uutgoan, noar al die mèèns’n , diet neet noar buut’n könt en gen bezeuk könt ontvang’n. Blieft zô völle meugelijk vedan goan met lèèm’n. Vuur alle gelukkigen, belt ze ne kèèr extra, lôôpt wat vaaker um ’t huus hen, de natuur steet op spring’n. Snoeft het vuurjoar op, nemt met Poas’n een ei-ke extra. Loaw we hopp’n det “Goei’n Vriejdag” het begin is van iets goods, zôdet wiej volgend vuurjoar wier in de mysterieuze vlamm’n van het lèèm’n könt kiek’n. Vuur iedereene diet op wat vunne menèère dan ôk, met corona te maak’n hef, alle starkte en blieft volhôôld’n. Alle lèu, diet er vuur zörgt det alles zô normaal mèugelijk duur drèèit, deepe bewôôndering. Vuur alle ààndern, blieft biej huus. Volgt de vuurschrift’n op, zôdet ôônze harde warkers, alles neet vuur niks doot. De Poasvèur’n zölt dit joar neet bràànd’n. Misschien zal het wà nôôit wier hetzelfde wèèr. Mà volgend joar zal biej de mèèns’n wier het verlang’n kômm’n um lech, het feest van de opstanding en het herdèènk’n van al die bekèènd’n, diet neet meer ôônder ôôns bint. Vanof disse kàànte, vuur iedereene, een goeie Poas’n, blieft gezôônd en ôôit zölt de boakes wier bràànd’n.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.