• Leven in Holten
  • Contact
  • Leven in Holten
  • Contact

Ofbliem’n met de fikk’n

1
GEDEELD

Heij’ der oe ôk zô lilluk oaver e maakt. Ik kan ’t miej vuurstell’n. Biw we bliej det ’n korhaan’n en de kèune wier in darp stoat, bint er lèu diet mèint, det ze ze vôt könt jatt’n. Het is godsgeklaagd en ie hebt à gauw de neiging um met ’n vinger ne bepaalde kàànte uut te wiez’n. Zukke dinge köj’ dèènk’n, mar àj’ ’t neet hard könt maak’n, möj’ der oe de vingers neet an bràànd’n. An de ààndere kàànte àj’ ’n vinger der achter könt krieg’n, hôôlt het neet vuur oe en gèèft alles wàj’ der oaver wèèt duur an de plietsie. Noe zölt de kèune wal an de buurte weer, zô heur j’ de lèu proat’n. Zie könt ze zô met nemm’n, zie stoat völs te vlak an de weg. Zô is ’t en doar möt ze bliem’n stoa. Wat is ter noe neet mèuier as een stel spöll’nde wichter biej de kèune? Wat heij’ noe an môôie beeld’n, diet in ne zooltlôôze stoat, hèèmoa niks toch! Het helpt netuurlijk wà det den camera op ’n Beelt dag en nach an steet, mà wat nog meer helpt bint die achttienduuz’nd ôôg’n van al die Hoolter. Met mekaa möw we waak’n oaver de kèune op ’n Beelt. Met mekaa möw we waak’n oaver ôôns culturele arfgood. De ôôldheidskamer geet ôôns doar in vuur. Vriejdag doot ze de duur’n van het ôôle gemeentehuus wier lös. Het is machtig môôi verbouwd en zie hebt het hèèle gebouw noe vuur eur zelf. Met nen expositie oaver de barbiers van Hoolt’n, kriej’ het geveul, daj’ wier biej Kaalsdieks ôônder ’t mes goat. Het was ter ofgelôôp’n wekke à zô vol, dà ‘k spontaan zèère “Het is miej völs te drôk, ik kômme männ’n wà wier.” Woet ze ôk machtig drôk bint e wes, op ’n Hoolterbarg, biej ’n Canadeez’n karkhof. Dôônderdag 21 april wördt het nieje informatiecentrum op e lèèvert en dan könt ze binn’n an ’t wark. Het nèudigt noe al uut um der èèm’n te goan kiek’n. Lèu nog een paar moand gedeuld en Hoolt’n hef der wier ne toeristischen trekplèister biej. Bint ze in ’n Hoolterbarg an ’t opbouw’n, op ’n Kol geet het net àànsumme. Zie blieft er an ’t ofbrekk’n. Het huus op ’n hook van ’n Dikkensteensweg is ôk neet ontkömm’n an ’n sloopershamer. Doar woet ôôit de bona kuipjes en de kèune eur weg begunn’n noar de winkels in ’t hèèle làànd, doar is alles vuurgood plat. Ééne grôôte zààndvlakte, met in de veert’n ôônz’n Hoolter toor’n. Det is het eenigste punt van herkenning en det is mà good ôk. Ie zôll’n der met an ’t dwaal’n kômm’n. ’n Kol begint an ne nieje tied, met nieje huuze, zôônder industrie. De Blauwwitters begint an ne nieje competitie, mà dan wal in ne hèugere klasse. Zie bint kampioen en doar heurt gelukwèèns’n biej. Vanof disse kàànte, gefilstèèrt en völle succes in de dèirde klasse. Wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.