• Evenementen
  • Webcam
  • Evenementen
  • Webcam

Niejsgierig

Èèm’n langs de Poasveur’n. Ôônderweg noar ’n Diekerhook drèèj’ ie de Pasmansweg op. Vanuut de veert’n zeej’m stoan. Àj’ èèm’n neet oplet is e uut beeld. Woer is e blèèm’n? Zôônder wat te zeen, goaj’ ‘n Schoap’ndiek op en dan in één kèèr kump e wier in beeld. Àj’ der vuur stoat zeej’ pas wat vun nen onmeunigen bult hoolt of ter al an zit en nog völle meer wat er op möt. Honderden ingepakte karsbèume ligt kloar um noar boam’n te word’n esjouwt. Zôl det dit joar het verschil maak’n? Gauw de leste dag, hèugte maak’n met ne duursnèè van vief meter? Wiej zölt het zeen. Op noar Splôô. Het vèur steet pal an de ôôle weg noar Niej Hèèt’n. In ne smerige kôôle hagelbujje bint de jongs neerig an het stapeln. Zie doot neet ôônder vuur de Diekerhookers. Sjonge jonge wat ne bujje. Onwillekuurig goat gedacht’n trugge an de joar’n daw we zelf zatt’n te euiz’n met die onwillige kôôle täkke. Steigers haw we nog neet en aj’ neet nat wörd’n van den schnèè, was het wà van det smeerige natte hoolt. Het is duudelijk det het hèugste Poasveur in Splôô of in ’n Diekerhook kump. Det wördt nog duudelijker àj’ biej de Bèusebarg goat kiek’n. Twei rieg’n dikke bint ze an het stapeln. Het onwillige kale hoolt is èèrs an de buurte. Op zied van den Poasbult lig het mooie denn’nhoolt kloar um in de leste daag’n te word’n in estökk’n. Zie goat duudelijk vuur het meuiste poasvèur of de grötste boake. Het is in ’n Bèusebarg duudelijk det ne boake der uut möt zeen as ne biej’nkorf. Mà zie hebt het nog neet ewunn’n. De Hoolterbrookers timmert letterlijk en figuurlijk an de weg. Zie bouwt de boake net as in ’n Bèusebarg. Det wördt nog spannend vuur de kuurmèisters. Het is gezellig op ‘t Brook. Zie hebt alle mèubels van stal ehaalt en noar het zwoare wark, ligt ze àmoa làànkuut um het kààmpvèur, preuvend an ne dik verdeende consumptie. Vuur de zôvölste kèèr köj’ zeen det alle buurt’n het doot um de gemeenschapszin. Neet vuur de vrèimd’n of de hôôge heer’n, nee, lekker met de hèèle buurte, met mekaa iets vuur mekaa maak’n. Zô lange as det de driefveer’n bint, zölt de Poasvèur’n, ôk den op ’n Lech’nbarg, op ’n èèrst’n Poasdag bliem’n bràànd’n, as het tenminste neet te drèuge wördt. De rèègels bint als mà strakker ewörd’n. Het zal sloek’n weer, mar ôôit zölt ze toch in de fik goan. Wiej goat vuur môôi zunnig Poasweer en Poasboakes zôônder ongelukk’n. Ééne goeie road nog, neet te völle eier ett’n.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.