• Evenementen
  • Verenigingen
  • Bedrijven
  • Webcam
  • Evenementen
  • Verenigingen
  • Bedrijven
  • Webcam

Ne bezunder’n dag

Vanalles steet er op de rolle. Karsversjes zing’n met de Korhaan’n. As ’t er van kump tenminste. Berich uut ’t zeek’nhuus, twei centimeter ontsluuting, veerder is alles good. Ik veule miej neet op mien gemak. Het wördt ne bezundere wekke. ‘N oftrap vuur het oop’nluchtspel, Fanfare en vriejdagmänn’n um tien uur mag ik mien opwachting maak’n in het Hoolter kultuurhuus. Zôl der wà volk kômm’n? Ie zölt doar mà stoa te prèèvel’n met twei man en ne peerekop vuur oe. Loaw we der het beste mà van hopp’n. Het grôôte vuurdeel is, dà ‘k ter neet vuur de èèrste keer stoa te klasjenèèr’n. Al in de vieftiger joar’n kôj’miej doar al heur’n. Al wadd’n het toen allèène miene klumpkes, diet oaver de klinkertjes klettern. Gen kultuurhuus, zelfs gen gemeentehuus was ter te zeen. De Jödd’nkarke stun der toen ôk à haveloos biej. Wiej hadd’n der as kleine wichter gen benul van, van wat er een joar of tiene eerder àmoa gebuurt was. Het was ter nog hèèl röstig in de tied, det Naatje van Spier doar nog oaver boam’nduure kek. ‘N èineke veerder zat Willem, de schouwmaker oaver zien’n bril noar buut’n te kiek’n. Hèèl èèm’n mà, wat ààns heuiwt e zich op de vingers. An de ààndere kàànte, op ’n hook met het Boskààmpsstreuitje, is Ko de Mik drôk in de weer, in ziene pott’nbakkerieje. Tuss’n de Slieter en de kuuperieje van Westerik duur, maak’n ie de lusse rôônd, noar Bets van ’n Bos op ’n Beelt. Doar tèèg’noaver, woej’ noe ’n ingàànk hebt van het kultuurhuus, was in die joar’n, de garage van Muller. ‘N Smidsbeelt lag ter rustig biej. Hier klopp’n het ôôle harte van Hoolt’n. Wiej haal’n daor de kràànt’n op en wier later drunke wiej der, met de braderie, ’n biertje. Vèèr centimeter ontsluuting. Het kump nèuider. Was ’t mà vaste vriejdag, mà zô lange möj toch ech gedeuld hemm’n. Wier twei centimeter meer. Ik heb het geveul, dè ‘k zelf las kriege van weeën. Ik heb ’t neet meer en griepe van armood noar ’n midwinterhoorn. Het mag wier. Het hôôge klaag’nde geluud drif veer oaver de kaale veeld’n. De hèèle moand december wördt er op zundagmiddag tuss’n tweie en dreie bloaz’n, biej het uutkiekpunt an de Plagg’nweg. At Jan Eftink zien’n hoorn an de môônd zet, zeej Ôôld Mieneke, op ’n bessemstell’n, oaver ’n Hoolterbarg goan. Het antwoord kump uut ‘nen ààndern hook. Aj’ good lustert heur j ‘Jan Veeldhuus, op zien’n midwinterhoorn, achter det mèinse an vleeg’n. Machtig um te heur’n en èèm’n ’n Hoolterbarg in is nog gezôônd ôk. Zelf krie ‘k ter vandaage wèinig geluud uut. Half vieve, doar geet de telefoon. De dochter an de lìene vanuut ’t zeek’nhuus. Gefilstèèrt, ie bint ’n uur gelèène opa e wörd’n. De telefoon geet hèèl gauw duur noar opoe. Ie wordt er stille van,…Mart, Frederik, Teunis,   een klein treuintje,… alles is good! Wat een geluk, môôie bleumkes at ze plukt bint. Wis en waarachtig.

De Vèèrkàànte Viefkop.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Reacties 4

  1. tegenwind says:

    Zwarte van harte,en ok de vrouwe natuurlijk.

  2. tegenwind says:

    Zwarte van harte,en ok de vrouwe natuurlijk.

  3. Truus Lichtenberg says:

    Gefeliciteerd met jullie kleinzoon!!!

  4. Truus Lichtenberg says:

    Gefeliciteerd met jullie kleinzoon!!!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.