• Leven in Holten
  • Contact
  • Leven in Holten
  • Contact

Keunefeest’n, wat was ’t wier môôi

7
GEDEELD

De Keunefeest’n ligt achter ôôns. Wat was het môôi. Nemt noe den Zwart’n Jannes op het bedriem’nborreluur en wat dach ie van den trekzakharmonika op zundagmiddag, dent buut’n, de jonge lèu massaal um zich hen had stoan. Ôk ôônze senioor’n kwamm’n op zoaterdagmiddag volop an eur trekk’n.

Het was ôôlderwets meedein’n in ne volle tèènte en op het Kèunefeesplein. .Wiej hebt er van genött’n. Loaw we hopp’n det dit Hoolter fees nog lange blif bestoa. Het noazommer geet nog altied vedan. De Loarnse karmse heij’ mött’n miss’n umdet het teglieke was met de Keunefeest’n.

Gelukkig steet er al wier nen ààndere karmse op het programma. Neet zô mar eene, de Battumse Karmse en det à vuur de 477 ste kèèr. De moandag is de dag, det de Battummers noar de karmse goat., mar ôk völle volk uut ’n veer’n umtrek wèèt Battum dan te vind’n. Het is ne dag van “ons kent ons”. Völle ôôle bekèènd’n proat hèèmoa wier biej en drinkt een biertje met mekaa. Ie hooft er neet zô vrog meer hen as vrogger, want schoap’nmark is ter neet meer. In die vroggere tied’n wörd’n der scheuipe en àànder kleinvee an evoert en Hoolt’n zôl Hoolt’n neet weer at, van die hààndel, an het èine van ‘n dag nen hôôp op Hoolt’n an gung. Hoe later op ’n männ’n, hoe meer of ’n hààndel zich verplaats’n noar het neuistliggende café. Vuurdàj’ der arg in hadd’n krèèj’ ne geit of ne koppel kipp’n an de bokse.

Mar ôk in disse tied is ’t nog altied onmeunig gezellig in en rôôndumme de Brink. Völle Hoolter hebt in alle joar’n de Battumse Karmse wà bezoch. Det kan ôk neet ààns, want vaake bint er Hoolter artiest’n, dit joar ôônze Reeperbaaner Stemmingmakers uut ’n Diekerhook. Vuur bezeukers van alle lèèftied’n is ter wat te belèèm’n. An iedereene wördt edach. War dach ie van de Langenbarger bloasmuziek op zundagmänn’n, of Kappie op het senioor’nfeest bie het kultuurhuus op moandag. Ôk het Brookduo völt te bewôôndern op de zoaterdagmiddag. Nog één keer de Badmusse op de vioole. Hij schèidt er met uut. Kortumme, te völle um op te neum’n. Môch ie meer van röste hôôl’n, dan pak ie een drankje op het hèèle groote terras rôôndum de karmse.

Netuurlijk, op zundagmiddag, de joarlijkse koets’ntoch, inmiddels uut ebreid met ooldtimers en en ôôle traktoor’n. Noa de tied èèm’n met de kleintjes noar de drèèimölle en dan met ne buul olieboll’n, ne grôôt’n lollie en ne ballon op huus an. Nee, scheuipe zöj’ der neet meer tèèg’n kômm’n, hôôguut ééne, het zwarte schoap.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.