• Evenementen
  • Verenigingen
  • Bedrijven
  • Webcam
  • Evenementen
  • Verenigingen
  • Bedrijven
  • Webcam

Hèuiweer

Op de lang terugrèize vanof mien vakààntieverblief völ op hoevölle bèume of ter het lèudje hadd’n eleg, vermoedelijk duur de onmeunige drèugte van vuurig joar. Oaverà links en rechts, veer van de snelweg of, zeej’ de broene denn’n en bark’n der triesterig biej stoan. Gen wôônder det er biej ôôns ôk bark’n verdrèugt bint. Is det de opwarming van de aarde?

Behaaglijk zit ie in de busse, buut’n 37 groad’n. Op de helling’n van de Alp’n bint ze nog ôôlderwets an het marteln met het hèui. Det is biej ôôns wal ààns. In Darp mark ie àgèèt neet meer det er ehèuit wördt. De leste boer’n en vèèhoolders bint à lange vertrökk’n uut de kern van Hoolt’n. In de joar’n vieftig en zestig, vuur de mechanisatie van de landbouw zag ie ze ’s mäns vrog à goan op de fietse. Zeis’n op de nekke en dan wörd’n der grös emèèit. Doar wadd’n de keerls àllèène à daag’n met gangs. De vroole gung der achteran um het grös lös te schudd’n, zôdet het harder drèug’n. Det môs nog wal een keer, um het àmoa good te krieg’n, want hèuibreui zat gen mèense op te wacht’n. As alles op rullekes verleup hàj’, noar een dag of wat, drèug hèui. Niks in baaltjes, alles geet in de rille en wörd lös op de platte waag’n elaad’n. Vèèr stoanders zörgt ter vuur det het losse hèui der neet ofglid.

Èèm’n pauze, de vroole hebt stoete en drink’n biej eur. Gezellig zit jôônk en ôôld biej mekaa. Het laad’n begint. De keerls buugt met ôônder het gewicht van de grôôte öppers hèui, diet wordt op estökk’n. De vroole bint an ’t noahark’n, zôdet de wèire schôône achterblif. Dan geet het op huus an, waag’n noar waag’n zeej’, met het peerd der vuur oaver de weg hen schoem’n. De vèurman zeej’ bienoa neet, den zit argens verstopt ôônder het losse heui. Tut laate in de oamd schoeft de waag’ns duur de stèège. Männ’n wacht er ne niej’n dag, met onweersbûjj’n. Zôw we het hèui op tied binn’n krieg’n?

Wier biej huus van vakààntie, zee ‘k det de buurman an het grös mèèj’n is. Een half uur later is de hèèle vèèr bunder kaal. Denzelfden dag geet e der met krach en geweeld met de schudder oaver hen en 24 uur later lig de wèire der wier kaal biej. Het grös geet tèèngswoorig hèèl snel an de rolbaal of de koele in. Oaver ne wekke of wat wördt er wier emèèit. Loat het onweer mà kômm’n

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.