• Evenementen
  • Verenigingen
  • Bedrijven
  • Webcam
  • Evenementen
  • Verenigingen
  • Bedrijven
  • Webcam

Het geet de goeie kàànte op

Noe zöj’ drek zegg’n, die keerl hef ter ééne hen waterdörs’n. Doar heij’ geliek an. November heiw we nog neet half e hat en december steet nog vuur de duure. De daag’n wordt àllèène mà körter. De duustere daag’n stoat vuur de duure. Wat heet duuster. Sunterkloas en Zwarte Piet, de karsdaag’n en Ôôld en Niej. Daag’n woej’ van könt geniet’n, saam’n met de neuiste femilie. Sunterkloas en Zwarte Piet, van miej meugt ze bliem’n. In miene kindergedach’n is Piet zô onmeunig zwart umdet e biej iedereene duur ’n schorssteen môs kroep’n en met Sunterkloas hè ‘k ôk gen meuite, ôk al is e dan katholiek. Het belangriekste is det ze kedootjes blieft breng’n. ‘N schorssteen möt bliem’n rôôk’n en doar heurt Zwarte Piet biej. Nee, het geet de goeie kàànte op. Vuur ’n tiedje trugge heur’n ik det Gemeentebelang der op andrung, det ’n Hoolterbarg wier op de anwiesbord’n môs kômm’n. Netuurlijk möt det. Det is in ’t belang van de gemeente en van iedereene diet doar de kos möt verdeen’n. Dus neerzett’n die bordjes. Vôt uut de recessie. Het geet de goeie kàànte op. De VVD en Gemeentebelang bint ne liestverbinding an e goane. Det dut een mèènse good. Vrogger vöch’n ze mekaa nog wal is de tèènte uut, mà kennelijk bint ze der noe achter. Ie wèèt wà, as twei hûnne knibbelt um een bot, löp ter ne windhôônd hard met vôt. Den restzetel mèin ik. Noe vreug ik miej of, woerumme of det net noe àmoa noar vuurt’n kump en doar kump ’n aap uut mouwe. Volgend vuurjoar bint er wier verkiezing’n vuur gemeente en det is netuurlijk bes wà spannend, noet het kabinet zô slech in de peiling’n steet. Woer möt Riess’n-Hoolt’n toch op stemm’n? Vuur ne hôôp lèu steet het vaste, die blieft biej het ôôle. Mà de VVD en PvdA-stemmers, wat möt die? De SP en de PVV doot neet met, dus wat dan? Doar bint gelukkig niejkômmers, D 66 en Lokaal Liberaal. Ie könt alle kàànt’n uut of ie blieft gewoon biej het ôôle. Want ôk al geet het in ’n Haag neet van een leien dakje, ôk à zegt mastedont’n det de eurofiel’n nog arger bint vuur Europa dan de tèèg’nstàànders, in Hoolt’n is ter de ofgelôôp’n joar’n ne hôôp gebuurt. Kiek mar is um oen hen op ’n Beelt en hôôlt mar is in de gaat’n wat er e bouwt wördt op ’n Kol. Netuurlijk ne klèinighèid hôôl ie altied, um mar èèm’n de ôôle pôômpe en ’n Dikk’n Steen te neum’n. Alhoewel det leste is gen klèinighèid. Hoolter het is noe wier de tied um oe te loat’n heur’n. Ôônze politici bint er riepe vuur. De verkiezing steet vuur de duure en doarumme, iedereene wakker word’n! Ôôg’n en oor’n lös, zôdaj’de juuste stemme uutbrengt. Één dinge steet as ne poal boam’n water, het geet de goeie kàànte op, stemm’n is ôôns good rech, stemm’n dôôdgewoon doon, wis en waarachtig.

De Vèèrkàànte Viefkop.

De Vèèrkàànte Viefkop

De Vèèrkàànte Viefkop

Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp. ,,Ik schop en geef complimentjes. Een columnist verkondigt een bepaalde mening en de lezers kunnen zelf bepalen wat ze er mee doen. Soms herkennen mensen zich er in. Enkele verhalen kunnen ze niet met droge ogen lezen, is mij verteld.''

Gerelateerde artikelen

Volgende

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Meer nieuws

Log hieronder in op je account

Vul onderstaande gegevens in voor je account

Achterhaal je wachtwoord

Geef je gebruikersnaam of email adres in om je wachtwoord te resetten.