• Leven in Holten
  • Contact
  • Leven in Holten
  • Contact

Het elfde wereldwonder

0
GEDEELD

De viem’ntwintigste Kèunefeest’n köj’ wal een wôônder neum’n, mar um noe te proat’n van wereldwonder, geet misschien wà net wat veer. Mà toch, het is môôi um te zeen det er nog altied verniejjing in zit. Dit joar de niejje ankleeding van het plein. Netuurlijk hef het weer met e warkt en de gemeente. Zie hadd’n het grös um ‘n Dikk’n Steen zelfs e mèèit. Den steen zal wà te zwoar weer ne wes um rechop te zett’n. Noh ja, een begin is ter. Noe nog wach’n op die verdeende eereplaatse. Het Duutse buffet op de vriejdagmiddag dèur het good. Doar wadd’n ne hôôp lèu in “Lederhosen”. Met de Tiroler kapel wörd’n het een ongedwung’n feesje. De börgemèister opende de Kèunefeest’n en het borreluurtje saam’n met de vuurzitter van het hèèle gebuur’n. De Börgemèister was neet àllèène. Nee, hij was ter vuur de allerèèrste kèèr met het voltallige college. Det dèu feestvierend Hoolt’n good. Wethoolders diet oaver eur eeg’n schaduw hen springt, det völt te wardèèr’n. Loat’n zeen daj’ wethoolder bint vuur de hèèle gemeente. Zelf hà ‘k de eere um het brôôd met de heer’n te meug’n deel’n. Een begin van verbroedering, want det bint de Kèunefeesten. Verbroedering tussen alle Hoolter en veer doar buut’n. Det zag ie ôk op de zoaterdagmiddag, toen de euldern wier met konn’n doon op de klàànk’n van de verschillende koor’n. Zôônder ààndern te kort te doon, möw we het Shantykoor Riessen de kôômpelemèènt’n gèèm’n. Zie wadd’n de meuite van het anheur’n meer dan weert, àllèène det taaltje, het blif apart, mà det zölt ze van ôôns ôk wà zegg’n. Wat er met de Hoolter Deerns gebuurt is in een joar tied, wèè ‘k neet, mà zie zingt better as det ze ôôit e doane hebt. De Korhaan’n wadd’n in feeststemming, det môch ôk, want zie bestoat à wier twaalf en een half joar. Al met al ne merakelsen middag met völle volk en de zundagmiddag net zôô. Het hockey mèike verbroeder’n zich met de voetbaljonge. De ôôlde lèu genött’n van de klèine kinder. Det stroalende gezichtje van det klèine keerltje det betrök toen e zien’n plestiek’n hamer an ne sigrette heul, um èèm’n later wier te lach’n um den ijsco woet e met kon scheet’n. Binn’n regeer’n Bökkers in tropische temperatuur’n. Zô of en touw wörd’n der verkoeling e zoch in ne rèèg’n van bier, diet duur de tèènte vleuig. De hossende menigte leut het gewillig oaver zich hen kômm’n. Àj’ op huus an riedt achtervolgt oe de golven van muziek en het geroezemoes van al die feestende lèu. Hèinigan wördt het stiller. Thuus in ’n stool dèènk ie trugge an al die viem’ntwintig kèèr. Ie realisèèrt oe det det al die jonge lèu, neet better wèèt as det er altied à Kèunefeesten wadd’n. Een paar ôôle Fienpreuvers bint er nog, die wèèt wà better. In Hoolt’n kon gen feest word’n e maakt en doarumme mag dit bes het elfde wereldwôônder word’n e neumt, wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.