• Leven in Holten
  • Contact
  • Leven in Holten
  • Contact

Duurtraining Stark

46
GEDEELD

Van de wekke krèèg ik een fotootje op e stuurt van de Nölle. Elf jonge keerltjes kiekt hèèl onscheuldig de wereld in. Het fotootje hà ‘k in gen zestig joar ezeene, mà de jongs der op kenn’n ik nog àmoa. Zesde klasse van de lèègere schoole 1958-1959. Net in die tied was ter een keerltje, Barend Breukink, biej ôôns in de klasse ekömm’n. Hij kwam van Èènschke. Doar hadd’n ze Sportclub Enschede en die voetbald’n in een shirt met ne V der op. Hij was gek van voetball’n en det virus brache biej ôôns oaver. Wiej môss’n ôk een voetbalshirt, net as Sportclub. Det kwam trechte. Ãmoal een bloesje inlèèvern en Jan van de Kleermaker zien vaa maak’n der een voetbalshirt van. Det gung amoa nog neet vanzelf. De mooders gaff’n neet zô mar een bloesje of um te loat’n verknipp’n. Van Sunterkloas krèèg ik nieje voetbalschoone van quick. Wiej traind’n det de stukk’n der of vleuig’n. Noar schooltied as gekke ’n barg op noar Dikkers buske, langs Klein Zwitserland, steil noar boam’n. Wiej voetbald’n doar zô vaake, det het veeldje hèèmoa kaal wörd’n etrapt. Het wörp ziene vrucht’n of. Wiej wunn’n alles, mar an ’t èine van ’t schooljoar, veleuir we van Markel en völ het elftal vuurgood uut mekaa. À’k het good bekieke bint de mèèste van disse jongs in en um Hoolt’n eblèèm’n. Een stuk of wat gung’n der biej de voetbal en haal’n met glààns het èèrste elftal.

Zelf môch ik det neet. Vaa had op zoaterdag gen tied vuur zukke dinge en ôk wiej zelf wörd’n nog wal is in ezet biej het hèui’n, rogge bind’n, knoll’n trekk’n, eerpel gardern en pink’n was’n. Het was àmoa nog hààndwark. Pink’n wass’n, det was gen lekker wark. Met heet water, de strôônt van de beeste ofhaal’n, zôdet ze op de vèèmark vieftig geuld’n meer weert wadd’n, want doar môs ’n schorsteen van rôôk’n. Vèère wörd’n ôôndernemmers in Hoolt’n, twei schoolmèisters zatt’n der biej, tweie wadd’n der later biej de Sensation Rockets en tweie schupp’n het nog tut prins carnaval. Bienoa het hèèle köppeltje gung noar de Ulo in Hoolt’n en zô vund’n ze uuteindelijk ne weg noar de maatschappij van de joar’n zestig. Noe, zestig joar later bint ze der, op ééne noa, àmoa nog. Sommigen biej meer of minder uut het ôôge verleuirne, met ààndern heij’ het hèèle lèèm’n in Hoolt’n meug’n deel’n. Àmoa zèumtigers, de tied vlug, mà DTS biw we nôôit vergett’n.

Staand van links naar rechts: Herman Gazan, Albert van de Maat, Gerrit Markvoort, Henk Broekmaat, Hans Vincent, Jan Beltman. Zittend: Henk Littink, Anne Jansen, Teun Deijk, Barend Breukink en Herman Koopman.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.