• Leven in Holten
  • Contact
  • Leven in Holten
  • Contact

Drei wekke gen kràànte

13
GEDEELD

Heij’ wat e mist? Netuurlijk, ie mist de kràànte. Den is zô vertrouwd, de reklame en de stukskes van LJ. Mà LJ hoom’n ie neet te miss’n. Met de rèègelmoat van de klokke zag ie ‘m met die tropische temperatuur’n biej de Coop. Het völ wal op det e nôôit wat in zien winkelkeuirke had. Volgens miej was e der àllèène mar umdet de temperatuur doar zô angenaam is. Alle gekhèid op ’n stökske, de vakàànties zit er zô good as op. Volgende wekke begint de school’n en beginne wiej wier an het gewoone lèèm’n. Nôh ja gewoon, de corona is nog neet vôt. Wiej zit nog altied in de àànderhalve meter wereld. Sommigen dèènkt det het vuurbiej is, mà de schrik zit her en der nog hèèmoal in. De vakààntie heiw we duur ebrach in eeg’n làànd. Wiej bint er noe wier achter hoe môôi of Drèènthe en Oaveriessel bint en hoe zwoar of zunne vakààntie is. Wie hadd’n zelf geerne, ôônder noar Duutslàànd ewilt, geniet’n van de barg’n en een Duuts biertje. Jammer genog gung det neet duur. Noadet de buxus op hèugte was ebrach en ik met ne verkrààmpte rugge zatte uut tebloaz’n, raakt’n wiej een dag of wat later,verzeild in Ôôtmarsum. ‘Soamds schöt het miej doar nog arger in de rugge. Ik wassse touw an röste, mà niks ter van, alle daag’n een dikke vieftig kilometer op de fietse, met ôôndersteuning, diet of en touw of leut wèèt’n. Noa twei daage ha ‘k gen kôônte meer oaver. Gelukkig rèèng’n het op ’n dèird’n dag en krèèg het achterwark een betje röste. Mà eerlijke, ik möt touwgèèm’n, Twèènte is een môôi làànd. Wiej hebt genött’n van het Lutter zàànd en Sinkgraven. Toch kwam ik ter al met al met biej ’n strieker terechte. Det hölp, meer bewèèg’n en meer fiets’n, was ziene wieze road. De fietse is emaakt en noe vleegt de kilometers ôônder miej duur. Ie zeet vanalles en beseft nog neet half, hoe môôi of het rôôndumme Hoolt’n is. Völle lèu zeej’ op het Pieterpad, ôônderweg noar Maastricht. Zô zag ik een een paar jonge vroole umstebuurt’n op en neer goan. “Zo dames an het wipwapp’n?” Het antwoord kwam drek wierumme. “Nee meneer, dit is skwoss’n.” Ik had er nog nôôit van eheurd., Zô zeej’ daj’ ôônderweg op de fietse vanalles könt leer’n, met doarbiej vandaage wier het vertrouwde Hoolter krääntje. Wat wil een mèènse nog meer?

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.