• Leven in Holten
  • Contact
  • Leven in Holten
  • Contact

De hèèle wereld in de bràànd

0
GEDEELD

De Kèunefeest’n zit er op. Noagenietend fiets ik met de vrouwe op huus an. De muziek davert nog duur in mien hèufd. Zô mill’n op ‘t brook woj’ e grepp’n duur de röste op die grôôte vlakte.Net vuur de Pothaarsbrugge, drèèj ie hèèmoal of in nen ààndere tied. De tied steet doar stille en éénmoal in huus zak ie nog veerder weg, in deepe röste. ‘N ààndern männ’n is ‘t ààns. Ie wordt wakker met een geveul oj’ in bràànd stoat. Det wördt nog arger àj’ al het niejs in oe opzoegt. Het kultuurhuus zit in de bràànd. Ie möt er toch neet an dèènk’n, daj’ der neet meer op het terras könt zitt’n. Het industrieterrein “De Haar” hef twei sterr’n e krèèg’n. In Riess’n hebt ze der vèère, hoezô, is tweie dan neet good? ‘T schöt miej in één kèèr te binn’n dà ‘k, biej de Kèunefeest’n, twei ôôlde lèu op het nog dôôdlôôpende stuk van het belèèvingspad zee lôôp’n. “Zie zôll’n het geeld leever uutgèèm’n an de zörg vuur ôôle lèu, of neet dan?” Ik begriepe ze, völle euldern en ààndere zwakker’n veult een grôôte zörg op zich an kômm’n. Loaw we hopp’n det het good kump. Nog een paar moand, dan is e der wier, Sunterkloas met zien’n zwatt’n Piet. Zôl e zwart bliem’n? Zôl e moslim weer? Ja, van Sunterkloas wèèw we det e katholiek is. Kan det wà, in diss’n tied? Vuur de wichter maakt het àmoal niks uut en de grôôt’n zôll’n zich better bèèzig hôôl’n met belangriekere dinge. Hoe löp het of, doar in Oekraine. Ie heurt gen schreeuwers meer op de plein’n in Kiev. Misschien is det ôk wà better. De bràànd zit noe in één keer in Afrika, ne verschrikkelijke zeekte met ne völs te môôi’n naam, Ebola. Doar möt wat an e doane word’n. Zô völle dôôi’n, diet bienoa as paria’s wordt of e voert noar de leste röstplaatse. En dan al die dôôi’n, wek in wek uut, op de Middelandse Zee. Afrikaan’n, vluchteling’n en wiej stoat er biej te kiek’n. In Irak en Syrie brààndt de wereld hèèmoa. Alle daag’n gruuwelijkheed’n. Duuzenden lèu starft er nen akeligen dôôd. Onscheuldigen wördt in naam van het woare glèuve, ’n hals of e schnèène. Heult het dan nôôit op. Ie zôll’n zegg’n van neet. Oaverà op de wereld brààndt ‘t. Grôôte vèur’n en kleiner’n. Ie wordt er mèu van. Ie könt neet begriep’n det er lèu bint, diet van uut dit làànd, woerj’ alles in vrèè en vriejheid könt doon en loat’n, die ellende op goat zeuk’n. Ie könt er met de pette, vaake neet meer biej en dèènkt, loat weer, het zal mien tied wà duur’n, um èèm’n later te beseff’n, det het good is det er lèu bint diet zich der wal drôk oaver maakt. Prinsjesdag, wiej wèèt wier wat ôôns vuur het kommemde joar te wacht’n steet. Loaw we hopp’n det de mèèste vèurkes e blust wordt, wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.