• Leven in Holten
  • Contact
  • Leven in Holten
  • Contact

Eff’n de knèupe tell’n.

0
GEDEELD

Doar zit ie dan op ’n dèird’n karsdag, todderig ôônderuut e zakt ôônder’nkarsbôôm. De èèrste noald’n begint ter of te guur’n. Det vuurspelt neet völle goods vuur het opniejs pott’n van det bèumke. Aj’ zô ôônderuut e zakt zit vroage ie wal is of wat het ofgelôôp’n joar e brach hef. Wille en vedreet gung’n hàànd in hàànd. Aj’ wat veerder um oe hen kiekt in de weereld, heij’ à gauw in de gaat’n det het àmoa nog völle slimmer kan. Màr àj’t op Hoolt’n betrekt bekrup oe toch het geveul daw we wier wat kwiet bint. Hèèl stark hè’k det met de Hoolter Kràànte. Zô ôôld ak binne, alle wekke greppe wiej noar de Hoolter Kràànte. In de begintied was det de kràànte van Beijers en Wiggers. Zô klein as Hoolt’n was, iedre wekke brach’n zie ôôns het niejs. Later wörd’n det ààns, mà vuur ôôns blèèf de Hoolter Kràànte een geveul, det biej ôôns heur’n. Doarumme biw we ôk altied abonnéé e blèèm’n. Disse wekke zal e vuur de leste kèèr in de busse vall’n. As ne deef in’ nach sliepstat te der tuss’nuut. Het zal zeer doo en wiej zölt ‘m miss’n in’t nieje joar. Het geschrèèm’n Hoolter niejs in de Hoolterkràànte vuurgood vôt?! Het Hoolter geveul löp wier ne grôôte dukke op. Wiej zölt die paar Hoolter advertenties tuss’n de ààndern weg mönn’ bliem’n zeuk’n. Wiej zölt het Hoolter niejs mönn’ lèèz’n in West Twente, àj’m tenminste kriegt. Vuur die elfhonderd hondstrouwe lèèzers in Hoolt’n hop ik det. Alles wat buut’n Hoolt’n wônt zal zich möt’n abonnèèr’n. Zelf za’k det neet doo, want vuur miej geet West Twèènte neet veerder as Riess’n. Ik hoppe det ter ôôit nog wier midd’nstàànders bint, diet in de gaat’n kriegt, det ze’t möt hemm’m van het Hoolter volk en alles wat ter dichte umme hen wônt.Det ze ’t möt hemm’n van de vrèim’n, diet in Hoolt’n kômt. Zô as ’t noe geet, doot ze der good an met, um de lèu mà zô völle mèuglijk noar ààndere plaats’n te jaag’n. Het Hoolter geluud starft hèinig an uut, zô schrèèf ik in mien leste schriem’n in de Hoolter Kràànte. Het gung neet langzaam, mà het was in één kèèr gebuurd. Het Hoolter geluud was e snèuvelt in zien eeg’n kràànte, mà krèèg ne nieje kààns biej de jonge Hoolter op Hoolt’ns niejs. Het mag dan zô wèè, det het plat zô gangswieze minder wördt, toch hop ik det de jong’n met dit stukske noar va en moo, opoe en opa goat um’t te loat’n lèèz’n. Ik wèèt det ze der de ofgelôôp’n vèèr joar vaake schik an hebt e had. Det hef miej good e doane. Zo lange à’k kan en magge goa’k vedan met schriem’n. Het geet miej neet um het geliek allèène, het geet um een geveul, det ôôns bindt. Àmoal, völle geluk en zèèg’n in tweiduuz’ndtiene en blieft gezôônd.

Wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.