• Leven in Holten
  • Contact
  • Leven in Holten
  • Contact

Wat is belangriek?

1
GEDEELD

De verkiezing’n zit er op. De Riessense pertiën hebt twaalf zetels. De ààndern hebt er darttiene, Doar zal wà neet völle verààndern, de slöttel is in hàànne van het CDA, het los doon van de winkels op zundag. Ie magt van disse pertieë verwacht’n det ze de rugge rech hôôlt. Zie hebt ne hôôge pries betaald vuur hun stelling oaver winkels. Àj’ dan toch nog duur de kneene goat, zet ie oe zelf vuur schut en könt de Hooltense CDA stemm’n ôk nog wal is op ’n toch kômm’n te stoan. Gemeentebelang hef ter ééne hef e wunn’n, det is wins. Met mekaar op het pluche, det kan, mà dan wàl an de beloftes dèènk’n diet er edoane bint. Netuurlijk meugt ze in Riess’n de zundagsröste hôôld’n, mà zie hooft neet an de res van de gemeente eur’n wil op te legg’n. De Hoolter kriegt ne grôôte veere op ’n hood, vuur het èèrste in al die joar’n, ne hèugere opkomst as in het Riessense. Meer as viem’nzèumtig precèènt. Wiej bint op de goeie weg. Het mèuiste zôl weer at Gemeentebelang en de VVD, mekaa biej de hàànd pakt en ne stèèvige voes loat zeen an ôônze kammereui in Riess’n. Veerder loaw w’t oaver an de lèu diet er vuur duur eleert hebt. Zie bint ekèuz’n en zie möt het de kômmende vèèr joar vuur ôôns wier trechte stôôt’n. Ôôndertuss’n vlug de tied, Palmpoas’n zit er op, völle wichter met een haantje hè ‘k neet e zeene en grôôte koppels wichter met eiernetjes, op weg noar de Poasweire, het is neet meer. Eiernetjes, ie wèèt wà, van die gehaakte netjes in verschillende kluur’n, woet oen mooder dan een stuk of wat sinaasappels in dèèd en wat hard gekokte eier. Op Palmzundag krèèg ie der dan nog een een zuukelaa ei biej en opoe verwenn’n oe met ne riege kleine zuuker eijkes um op te ett’n. Een eiernetje, wie zol det nog könn’n haak’n? Èigelijk zôll’n alle mamma’s det toch nog mönn’n könn’n. Het is neet meer van disse tied of toch wà. De Poasvèur’n, half Hoolt’n is ter drôk met. Vief grôôte vèur’n binn’n de gemeentegrèènze. Zoaterdag trek de jury, met de börgemèister langs de boakes en wèèt e wiej wiet ’n grötst’n of ‘n mèuist’n hef en wiet met de ontvangstpries geet striek’n. RTV Oost zal der biej wèèn en zundagoamd wördt er uut e zund’n vanuut Hoolt’n. Dit kèèr bint ze in ’n Diekerhook en rekk’nt ter mar op det Hoolt’n wier op de kaarte kump te stoan. Poasvèur’n bint onmiskenbaar met ôôns darp verbund’n en loaw we hopp’n dat det nog joar’n zô mag bliem’n. Het hèugtepunt, de priesuutreiking biej Toontje.De ontlading van moandenlàànk pôkkeln in weer en wind. Het belangriekste is de wille biej het bouw’n en het met mekaa geniet’n van de warmte van het Poasvèur. Det er dan ôk nog is duuzenden vrèimd’n komt kiek’n is met enömm’n. Fijne Poasdaag’n, neet te völle eier, op noar het vuurjoar.

 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.