• Leven in Holten
  • Contact
  • Leven in Holten
  • Contact

Los Cantinos Canibales.

0
GEDEELD

Tweed’n Pinksterdag môs ik ter an trugge dèènk’n, de mèèst beruchte ploeg diet Hoolt’n ôôit hef e had. Ie zeet ‘m neet meer hang’n in de kantine. Woer is die foto? Wiej schrieft 1978. Hoolt’n is kampioen van de vèèrde klasse. De kampioenswedstried is, met grôôte ciefers, e wunn’ van Sallandia. Gert van Fenna geet op de schoolders. De Hoolter bint drôônk’n van geluk. Iedereene diet doar biej is e wes, zal det nôôit wier vergett’n. Alles dôômpeln zich ôônder in één’ grôôt’n feesroes. De spöllers van Sallandia dèud’n volop met. ‘N aandern dag blek det ze de traningsjäskes war’n vergett’n. De lèu diet ’n kroam noar al det gefees môch’n opruum’n, leut’n drek ne fotograaf komm’n en wörd’n vereeuwigd in de kluur’n van Sallandia. Zô ontstun der een zeldzaam plaatje, dent bekèènd is e wörd’n ôôndern naam, “Los Cantinos Canibales”. Het is het hèugtepunt, tut noe touw, uut geschiedenis van de Rôôd-Zwart’n. Noe, zô völle joar’n later, tweed’n Pinksterdag, ik zagge de bûjje à wier hang’n. Op noar de woonboulevard of Intratuin. Um van die bûjje verlöst te weer, hà’k biejtieds an e gèèm’n, dà’k noar de voetbal wolle. De pries was hôôge. Ik zagge ôôns cluppie wegzakk’n noar de viefde klasse. Het dut zeer, mà het is neet ààns. Wiej könt met mekaa nog is angèèm’n wat ter àmoal verkèèrd gung, mà het belangriekste is vuur het nieje seizoen, de schoolders der ôônder en zeen daw we trugge komt in die vèèrde klasse. Zô makkelijk is det neet. In de viefde klasse wördt nog meer e bikkelt en det zölt de Hoolter Rôôi’n ôk mönn’. Vech’n vuur iedern meter veeld. Det lukk’n de jongs van ’t èèrste diss’n Pinkstermoandag neet. Gelukkig was het vèèrde kampioen e wörd’n en det brach nog een betje stemming langs de liene in Zutphen. Biej het leste fluitje, lèèg’n der 22 verdreetige spöllers op de grösmatte. Een geliekspel, doar had gen één van beire wat an en zô kôn Echteld, biej de Witkampers, promotie noar de vèèrde klasse ofdwing’n, duur een oaverwinning van 2-0. Zoere droem’n, mà die hadd’n nog volle zoerder könn’ weer. Wat dèènk ie van al die keerls diet wà met mooder met môss’n noar de woonboulevard of de Intratuin. Doar möj’ toch neet an dèènk’n, nee dan kiek ie toch leever noar een pötje voetbal. Wat det betreft zitte wiej de kômm’nde tied good. Bi-j’ der ôk à met gangs, het invull’n van de uutslaag’n op het Hoolter Niejs. Neet vergett’n en ie könt nog ne taart’n winn’ ôk. Neet daj’völle kààns hebt, want alle kenners doot met en det bint ter hèèl wat. Nog drei wekke dan bast het lös. Hoe zôlt goan? Zôll’n der nog verrassing’n weer of is het wier net as altied, Nederlàànd hef de beste ploeg, mar an ’t èine steet Duutslàànd wier met de beker in de hèugte. Het zal toch is een kèèr neet woar weer, wis en waarachtig neet.

De Vèèrkàànte Viefkop.
 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.