Het klinkt oe in de oor’n as woord’n, diet nog veer van oe of stoat. De leste joar’n komt die weuire, ôôit uut e sprökk’n duur opa, hoe langer hoe vaaker noar vuurt’n. De ofgelôôp’n wekke heiw we könn’n vernemm’n det er een lid van de “Sensation Rockets” is hen e goane. Herman, Gompert Gazan, zo as e zich in latere tied’n leut neum’n. Hij is neet ’n èèrst’n, völs te jôônk is Toon Brands ôk al uut de tied e raakt. De Sensation Rockets, ôôit begunn’n as Silver Stars in 1961, in de revue van de Ulo schoole in Hoolt’n. Drei jongs en zelfs de zangeres Ans Beumer, zatt’n biej ôôns in de klasse. Al met al hef het mà zes joar e duurt. In die zes joar wörd’n ze wereldberoemd in de regio en Duutslàànd. Zie verààndern het muziekrepertoire in de dàànstèènt’n vuurgood. In Hoolt’n hàj’ tut die tied Kuuper Jänske en Schot Hendrik Jan. De arfenisse van die beid’n wörd’n oaver e nömm’n duur spölleman Jèurlink. Met zien Sallàànd Combo brach hij het Sallandlied de wereld in. De muziek vuur de jong’n wörd’n ech e spölt duur de Rockets. Het was ne weele tied met àmoal prachtige verhaal’n. Supporters diet met ne extra busse mettrökk’n noar de optredens tut oaver grèènze. Stekkers diet uut de gitaar’n wörd’n e trökk’n umdet er wat te völle was e offert an Bachus en goat zô mà duur. De tied’n van de Beatles, de Rolling Stones en de Buffoons. De hoogtijdaag’n van al disse held’n ligt inmiddels veer achter ôôns. Zô is ’t ôk e goane met de Hoolter Rockets. In 1967 begun ze met huuske, bèumpke, beesje en was ’t in één kèèr gebuurd. In 1981 nog één kèèr nen oplèèving met ne reunie biej de Poppe. Nog één kèèr wier twei oamde ne stààmpvolle zaal en toen wörd’n het vuurgood stille. Toch àj’ op ne môôi’n zundagmiddag rôônd wààndelt oaver ’n Beeld’, köj’der nog wà wat tèèg’n kômm’n. De mèèst’n bint in Hoolt’n e blèèm’n en hebt inmiddels de zèum kruuskes te pakk’n. De muziekheld’n uut ôônze jeugd. De generatie van tèèngswoorig hef zien eeg’n helden en zô drèèit het lèèm’nsrad steuirig vedan. Gompert Gazan hef in de leste joar’n nog e spölt biej Old Skool, mà ziene gitaare zwig noe vuurgood. Wiej hôolt ‘m in gedach’n as solo gitarist van de roemruchte Hooltnse Sensation Rockets.Wis en waarachtig, net zô lange, tut dawwe zelf an de buurte bint.
De Vèèrkàànte Viefkop.