• Leven in Holten
  • Contact
  • Leven in Holten
  • Contact

Vuur poal stoan

1
GEDEELD

Ja en ik was ’n eenigsten neet. Vriejdagoamd vuur de opening, môch’n de poalzitters al èèm’n preum’n op het Lôô-feest. Nôh ja, èigelijk was ‘t een feest vuur de Hoolter in Lôô. De revue begun en vuurzitter, Erik van Gert van Egbert van de Mölle (Dikkers), dèu de opening. Hèèl Lôô was ter en ’n èerst’n diet met’n kop achter het gerdien hen kwam um te zing’n was Gerwin van de Keet (Paalman). Hij is biej de Pothaar in e trouwt.Ie wèèt wà, biej Alie Stevens (van de ôôle Schutte uut’n Diekerhook). Doar blèèf ‘t neet biej. Ôk Aaltje van Meint-Herman (Maneschijn) zung de sterr’n van ’n hemel. Netuurlijk dèud’n der ôk nog wà Lôô-Battemmers met, mà het wördt te völle um die àmoa te beneum’n. Nôh ja tweie dan, Wim Scholthof, good op dreef, met zien moat Appie Haarman. Det kan ôk neet ààns, de vuuroolders van Scholthof bint Wegstapels en Appie kik ter net zô uut as Herman Haarman, van de Bakker. De vaart zat er good in, de lèu genött’n en vuur daj’ der arg in hadd’n zatt’n de zeum keerls en die éene dèèrne van Beltman op’n poal te koekeloer’n. Doar stun wà tweihonderd man vuur poal, mà det wörd’n rap minder. Netuurlijk zat er ne Hoolter biej, Hette van de Vegte uut de Canadastroate. Twei peuile veerder zat de kleinzönne van ’n Darm (Oplaat, van ’t Rôôie Darp). De nach völ in en ’n ààndern männ’n zatt’n ze der alle achte nog. De vuurzitter dèu zien woord en noadet het Lôôse volkslied was e zung’n, nog e schrèèm’n duur Henkie van ’n Zuurtjesdokter (Ten Velde), begun Blankena uut Splôô an zien optochtrondje um de feeswèire. Hette zat er nog fit biej en ôk de ààndern maak’n het good. Zoaterdagoamd hadd’n ze ne figuurzager in e huurt, juust, uut Splôô en woer wont e, juust, in ’n Diekerhook, Remco van Zwatt’n Gait. Merakels, wat den kan met de zage. Hij kan ne moes maak’n. Det kan een normaal mèènse nog neet, ôk al dooj’m ‘t vel der biej. Hette bekek alles vanof zien’n poal. Zundagmänn’n was ter ééne e stopt, op doktersadvies. De ààndere zèume zagg’n de lèu de tèènte in goan, um met mekaa te ett’n. Èèm’n achter de pette en noar het “Goed zo”, in plaatse van “aam’n”, lustern noar, natuurlijk, de Möll’nzangers uut Diekerhook. Vuur miej kon het Lôôfeest neet meer kepot. Um drei uur môgg’n de held’n van ’n poal of. Zie wörd’n e huldigt en völl’n noa dikke dartig uur in weer in wind, bienoa stoandebeens in sloap. Môgg’n ze in Hoolt’n nog ne Kèundarper van ’t joar zeuk’n, vuur miej is Hette van de Vegte één van de kandidaat’n. Het zit er op, op noar de volgende katt’nkarmse. Het Diekerhookse Feest, zörgt dàj’ het neet mist. Vriejdagoamd, D.A.T. brààndt er op, de joarlijkse revue en zundagmiddag, Bôh foi toch. Diekerhook, àj’ van Dèimter noar Hoolt’n goat, kom ie der langs, wis en waarachtig.
De Vèèrkàànte Viefkop

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.