• Leven in Holten
  • Contact
  • Leven in Holten
  • Contact

Verbeelding en warkelijkhèid

1
GEDEELD

Vuur miej hè ‘k de lieste met opnames vuur ’n film, “Mirrewinter op ’t Plattelàànd.” Het geet gebuur’n. Het zal oele nog neet völle zegg’n, mà det kan nog wal is rap ààns word’n. De hoofdrolle is vuur Getje, ’n jungske met ne beparking, Ruben Haverslag uut’n Diekerhook. Moandenlàànk bint ze der à met gangs en vanof begin februari begint de opnames. Met de tekst van mien beschèid’n rulleke val ik hèinig an in sloap. Doar lôôp ik met mien zönne vuurbiej de karke. In één kèèr heur ‘k achter miej, “Doar heij’m wà den vuilen NSB-er.” De piene schnit miej duur ’t harte, stoa stille, mà lôôpe toch duur. Loat ze mà dèènk’n daw we biej de NSB zit, dan haale wiej ôk gen verdèènking noar ons touw. De scènes vleegt an miej vuurbiej. De jödd’n wordt wier of e voert. Ôônze Getje wèèt Sarah te redd’n. ’n Dôômie wördt dôôd eschött’n. Het zwèèt brek miej uut, at die Duutse suldoate miej uutkaffert. Gelukkig is den oaverval op ’t Gemeentehuus elukt. Hoe zal ’t oflôôp’n met Peurtje en Wondeel? Getje is de grôôte held, hoe verlöp zien veerdere lèèm’n? Biej ziene begrafnisse biggelt miej de troan’n uut de ôôg’n. In één kèèr stoa ‘k te kiek’n biej de opnames op ’n Canadeez’n Karkhof. Midwinterheurns klinkt van hèèl veer weg. De verbeelding en de warkelijkhèid lôôpt duur mekaar. Hoe löp het of met den NSB-er? Wat een fees in ’t darp, as de Canadeez’n ôôns bevriejd hebt. Getje boam’nop ne tänk en Sarah zielsgelukkig met eur’n Canadees. Net à’k wille kiek’n wie ter àmoa met löp in den bevrijdingsoptoch, röp de vrouwe “Koffie” en zit ik de tekst wier te reppetèèr’n um het mà zô môôi mèugelijk te maak’n. Eind meert möt het trechte weer en zal der van de honderden uur’n film, àànderhalf uur oaverbliem’n. Zô as ’t er noe noar uutzut is de premiere op D-Day, 6-6-2018. Vuurdet ’t zô veer is zal der nog hèèl wat water duur de Schipbekke stroom’n.
Zô as Getje de grôôte held is in de film, zölt de jongeren met ne beparking, zoaterdag, 3 februari, de grôôte held’n weer op het carnaval, biej manege Snorrewind. Het dak geet er of, as de Road van Elme, met Prins Poemba en adjudant Skool’n um drei uur, duur de peerdebak, de feestzaal binn’nkômt. Goat er gerust ne kèèr kiek’n, het is meer dan de meuite weert. Blieje gezicht’n van al die jonger’n. Ja Hoolt’n, het carnaval steet vuur de duure, prebèèrt er àmoa van te geniet’n. Doar is, jammer genog, à armood genog in de wereld.
Oh ja, neet vergett’n, maakt in meert van oen stemrech, oen stemplich, ààns möj’ oe wier vèèr joar stille hôôld’n, wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.