De vèèr grötste pertiën van Riess'n regèèrt. Zô beginne wiej an ne nieje roadsperiode. Hoolt'n is verdôôfd. Dit was neet verwacht. De ofgelôôp'n tied stun toch in het tèèk'n van, prebèèr'n der met mekaa iets van te maak'n. Stèègeman môs snèuveln. De ôôle coalitie leut de CU anschoem'n. Det àmoal um ne bettere verhoolding te krieg'n. Ie môch'n toch verwach'n daj' met die dèènkwieze veerder zôll'n goan? De SGP hef die kààns e had. Zie hadd'n neuis de CU, de Hoolter pertiën, Gemeentebelang en VVD met könn'n nemm'n. Dan had dikke zestig precèènt van de Hoolter stemm'n in 't college zett'n. Noe kump Hoolt'n neet veerder as een kleine vèèrtig precèènt. Beens kan proat'n as Brugman, mà hiermet hef e de duure noar Hoolt'n keihard dichte sloane. De SGP hef de Hoolter het mes in de rugge stökk'n. Zôiets verwach ie neet van de allerfienste pertieje in de Gemeente. Het al ôôlde gezegde dut wier opgeeld in Hoolt'n. Van fien' en môtrèèg'n woj'nat van. De SGP en ziene meuige zölt ter hèèl hard an mönn'n wark'n, vuurdet in Hoolt'n het vertrouw'n der wier is. Det zal neet metvall'n, aj' dan ôk nog lèèst det ze in 'Haag ôk genne hôôge pette op hebt van de plann'n, diet in Riesss'n van de tèèk'ntoafel komt. Zie goat röstig vedan met die wèèg'n woet ze in Hoolt'n zô tèèg'n bint. Ja, wiej hebt het oaver de nieje umleidingsroute langs het centrum van Hoolt'n. Ie lèèst het good in de Stentor. Gen wiekontsluutingswèèg'n, mà umleidingsroutes. Ie lèèst het good, 8000 auto's per dag oaver het HJ Wàànsinktracéé. Aj' uut goat van elf uur en elf minuut'n per dag is det iedere vief seconde eene. Gekk'nwark en det met ne lèègere schoole in de buurte woet de wichter den weg ôk nog is oaver möt stekk'n. Gekk'nwark? Det vroagt ze zich zelfs in 'Haag nog of. Woerumme möj'doar vieftig möt rie? Zie vindt dartig hard zat, mà volgens de gemeente schöt det neet hard genog op. Veerder hef de gemeente nog gen plann'n e maakt vuur 'n oaverlas an geluud woet de lèu doar met te maak'n kriegt. Al met al ne dikk'n onvoldoende en het zut ter noar uut det de Raad van State der hèèmoa of vuur een gedeelte ne dikke strèèpe duur haalt. Het blif anmôddern met de wèèg'n in Hoolt'n. Zôl dit nieje college ôôns de oplössing könn'n breng'n? Hèèl Hoolt'n zit ter noar uut te kiek'n det ter spiekers met köppe wordt e sloane. Zôl dan noe ech alles vuur mekaa komm'n? De Hoolter bint uut 'n road, doar kan 't neet meer an ligg'n. Het hef één vuurdeel. De bèire grötste Hoolter pertién könt met mekaa in de oppositie. Zie hooft mekaa neet meer of te vall'n, of zôl det zelfs neet lukk'n. Wis en waarachtig wà.

De Vèèrkàànte Viefkop.
 

In het begin van de vieftiger joar'n stun ôôns paosvèur in' Geurd'n. Wiej war'n net drei törve hôôge, dus zô volle heiw we der net an könn' doon. Wiej zung'n wà met van, Soertje met de keshott'n boam'n an. Het was àmoa hààndwark. Ie môgg'n bliej weer àj' op goei'n vriejdag ne waag'n hadd'n, met een een peerd der vuur. De Rooiedarpers wadd'n de tèèg'nstàànders. Möj' oe vuurstel'n. Det vèur stun biej het achterste veeldje in 't Sportdal, pal an de spoorliene. De trein'n rèèd'n dwars duur 'n rôôk hen en mangs stun 'n spoorwal ôk nog in de fik. Noe zölt ter in die joar'n oaverà wà boak'n hemm'n e stoane, mà miene wereld was nog neet grötter as 'n Gèurd'n en het voetbalveeld. Later wörd'n det iets ààns. De boak'n op 'n Kol en in' Noord'nbarg wadd'n de grötste konkurèènt'n van de Haarjödd'n. Zô of en touw kôn 'n Waterhook en 'n Bèusebarg doar tussen kômm'n. Het gung der fanatiek an touw. Zô kan 'k mie nog hèèl good herinnern daw we in die joar'n het poasvèur in' Noord'nbarg beslöpp'n um te kiek'n ow w'm in de fik kônn'n krieg'n. Soamds laate kröpp wie biej de Aalpolsweg, teeg'n de bult an. Ie kwamm'n der neet biej, het vèur wörd'n zwoar bewaakt. 'n Kol hef vaake wunn', mà ôk de Haarjödd'n hadd'n in één'zèumtig 'n grötst'n van Hoolt'n. Noar zes'nzèumtig hebt ze neet meer met e doane. In die tied heuik'n de poasvèurbouwers in en um Hoolt'n of, ôôndermeer duur de nieje huuze diet ter e zat wörd'n. Gelukkig hebt de buurtschapp'n het stökske oaver e nömm'n. Vuural het fees van nèèngtien een'zèumtig is mie biej e blèèm'n. Op zoaterdagmiddag kwam Jan Wiggers met de kuurders de wèire op. Doar was het à onmeunig gezellig en de éénpoters gung'n der in as kooke. Vuur an de wèire stun Jan van de Koetse met ne kinderwaag'n vol dràànk. Vuur det de jury biej de boake was, hadd'n ze der al een stuk of wat achteroaver mönn' sloa. Det geeld'n trouwens vuur iedereene. Vuur ôôns was 't duudelijk. Wiej hadd'n à lange kuurt en e zeene daw we 'n grötst'n hadd'n. Det wörd'n hèèl duudelijk kenbaar e maakt an de kuurders. De jury was 't ter gelukkig met eens en zô kôn de hèèle buurte met feest'n. Jong en ôôld was ter. Het blèèf neet allèène biej fees op de poaswèire. Hèèl Hoolt'n môch 't wèèt'n, Haarjödd'n boam'n en de Koljödd'n zat'n eindelijk is één kèèr in 't kisje van papier. Op ne platte waag'n met nen auto der vuur rèè we noar 'n Poasbult van' Kol. Het gung àmoal onbenullig en op ne kepotte fietse wörd'n der neet e kekk'n. Het was het “rech” van de winnaar. De wereld was klein, mà de wedstried was èèrns. Wis en waarachtig.

De Vèèrkàànte Viefkop.
 

Det is wat Mark van' Klein' Schreur ôôns met gif en drek doar achter an, Hoolten, hier is mien stèè. Het is een geveul, dè'k ôônderschrieve. Meer as zesduuz'nd man wadd'n der e kömm'n vuur ôônz'n Mark Tuutert. Hij hef 't toch mà môôi e flikt. Olympisch kampioen 1500 meter, 1.45.57. Het was wier Sallàànd, Sallàànd, hier is mien stèè. Hèèl Hollàànd kôn metkiek'n. Hoolt'n en Sallàànd bint wier op de kaarte e zet. Iedre kèèr, as Mark Hoolt'n of Sallàànd zeg, rinkelt de kassa. Doar geet het neet umme, mà het is wà môôi met e nömm'n. Scharp doar tèèg'noaver stoat de woord'n uut de môônd van de fractievuurzitter van de SGP. Doar wi-j' as Hoolter en half Riess'n neet biej heur'n. Ie möt oe toch wà ik wèèt neet wat veul'n, aj' de Hoolter het mes zô in de rugge stekt. Het veuilt neet te begriep'n. Zien vuurganger biej de SGP zèè vuurige wekke, biej zien ofschèid nog, det de tied van mekaa de oor'n wass'n, in plaatse van de veute, achter ôôns zôl ligg'n. Ik dèènk 't neet. De verkiezing'n ligt achter ôôns. De politiek is an 't woord en wat gebuurt ter. Mekaa de oor'n wass'n. Het nieje college is nog neet bekèènd. As de pries is, det hèèl Hoolt'n en half Riess'n zich möt schikk'n, in de bekrump'n rèègels van disse pertieje, dan bint de ààndern wà verplich um ze te loat'n vall'n. Disse lèu, ne grôôte groep, mà ne minderhèid in de gemeente, met in Hoolt'n mà één precèènt van de stemm'n, mag gen vatte krieg'n op het Hoolter geveul. Doar is gen pries te hôôge vuur. Roadsleed'n hôôlt det good in oe achterhèuf, ààns kriej' net zô völle strôônt oaver oe hen as de verteeg'nwoordigers van de SGP. At disse keerls wilt met regèèr'n oaver Hoolt'n zölt zie water biej'n wien mön' doon. Zô neet, dan möj'de hàànne wier in mekaa sloan en het zôônder de SGP, doo. Ie könt oe neet loat'n ringeloor'n duur 'n paar lèu diet dèènkt det de res van de mèèns'n 'n het biej 't verkèèrde èinne hebt. Doar is een ôôld gezegde. “At ze oe nèurig bint, et ze oe uut de hàànd en at ze an de mach bint, driet ze oe op 'n kop.” Netuurlijk, geeldt det vuur iedereene, mar ik heb ter toch nog wà verschil in wiet miej op 'n kop drit. Doarumme is 't beste, daj' zô of en touw noar boam'n kiekt. Wiej kekk'n massaal noar Mark van' Schreur. Ne gewoone Hoolter jonge, dent de ôôg'n neet in' zak hef e had en toevallig ôk nog is hèèl good kan schaats'n. Een vuurbeeld vuur de jonge lèu. Wiej bint ter in Hoolt'n grèuts op. Ôônze sportlèu möw we bliem'n huldigen in Hoolt'n, doar hoo we neet met noar 't Riesner gemeentehuus en ôk neet noar Lucky. De messe bint e slepp'n en Hoolt'n blif Hoolt'n.

Wis en waarachtig.

De Vèèrkàànte Viefkop.
 

Naar weer, biw we eindelijk of van det winterweer, hèw we niks aans as maaiem. Beesteweer, waterkôôld. Ie zet oe in' stool en loat oe gedach'n de vrieje hàànd. Dan veuilt het ôôge op de schilderieje, as herinnering an de viem'ntwintig joarige brulfte van opoe en opa. Vanof 1945 höng het vuur'n bozem op de kökk'n biej opoe. As de kachel rôôdgleunig stund, vlèug 'n rôôk in kringels um die schilderieje. Noa, det het zô'n viem'ntwintig joar biej mien vaa en moo höng, op nen ereplaatse boam'n de kamerduure noar de delle, hänk 't à wier een joar of wat biej ôôns vuur'n schossteen. In één kèèr kwam het bie miej op det, ak ter as kind lange noa kekke, het net was of ter kipp'n noar boam'n leup'n, langs de roggeoar'n, diet ter op stun'. Wà 'k ôk prebèèr'n, ik krèège die kipp'n neet meer in beeld. De kinderlijke gedach'n war'n vôt. In één kèèr môs ik dèènk'n an een paar ààndere schilderiejkes, diet nog altied in Hoolt'n in' café hangt. As kind kek ik doar wal is noa. 'S mäns tèèg'n uur of tiene stapp'n ik biej opa vuur op de melkfietse. Vuur op de stange hat te zunne hoolt'n klos e maakt. Doar binn'n in zat kràànt'n pepier. Det was tèèg'n 't beschadigen van de stange. Normaal hatte doar de melkbusse opstoan, mà dit kèèr môch ik vuur op stange met noar darp hen ofrekk'n. Ie kônn' der hèèl veilig zitt'n tussen die grôôte arme en ie krèèg'n gen las van zeere bill'n. An 't èine van 't joar wörd'n der in die tied of e rekk'nt en nao een paar uur gung opa dan wier op huus an, met ne flesse genèèver achter 't buis. Ik verveel'n miej noar noa vief minuut'n à hatstekke dôôd. Dan zwarv'n ik duur het hèèle café en oaver de delle. Mien andach wörd'n e trökk'n duur een paar schilderiejkes diet ter noe nog altied hangt. Ik gunge hèèmoa op in die jachtafereel'n, diet ter op stunn'. De tied vleuig vuurbiej en ik kwamme wier op de wereld at opa zeer; “Jonge goaj' wier met op huus an.” Het maak'n zun ne deep'n indruk dè 'k, noa al die joar'n, die schilderiejkes nôôit vergett'n binne. Vuur ne wekke of wat trugge midd'n ôônder 't carnaval kwam ik in det café an de proat met tweij jonge wichter. Zie verveel'n zich een betje en vreug'n miej of ik een verhaaltje wusse. Toen 'k die beire doar zô zagge stoa, dach ik an de tied dà 'k as kind met opa doar wasse. Det hèèle verhaal vertel'n ik an die beire ki-nder. Zie war'n één en al oor. Mien verhaal èindigen met de hoppe det zie oaver zestig joar nog met plezèèr kon'kiek'n noar die schilderiejkes en dan trugge dach'n an den ôôld'n keerl det eur doar, met de carnaval, oaver verteld had. Met plezèèr wörd'n ik wakker. Eff'n wà 'k het hôônneweer vergett'n. Wis en waarachtig.

De Vèèrkàànte Viefkop.

Hij is à lange uut de tied, toch zit e nog op mien netvlies in ne prèènt. Woerumme? Det prebèèr’n ik betje biej betje boam’n water te krieg’n. Wiej bint op e greuit met de bosschôp det de mèèste Jödd’n in ‘oorlog e blèèm’n war’n. Één van de wèinigen diet’ in Hoolt’n oaverlèèft hadd’n was ’n ôôl’n Kater. Zô hè ‘k ‘m op mien netvlies stoa. Nen ôôld’n man. Hij wônn’n an de Karkstoate. Vuur mien geveul zag ik ‘m alle wekke wà ne kèèr wààndeln duur Hoolt’n. At te honderd meter e leup’n had, röst’n e eff’n um dan zien’ weg te vervolg’n. Hij had van die duurdring’nde dôônkere ôôg’n. Ôôg’n woet het verdreet en de narigheid diet te had met e maakt, uut wier sprök. Zô veul’n ik det tenminste toen ‘k, noar al die joar’n, nem wier in miene gedach’n krèège. In die èèrste vieftien joar noar ’n oorlog wörd’n der neet zô volle proat oaver vèèrtig-viem’nvèèrtig. Wiej wuss’n det de Pachrachs biej Ab Jàànsen hadd’n e zett’n. Abraham en Lèwie zatt’n in vèèhààndel. Hèèmoa in e e börgert in het Hoolt’nse. Lewie kon zelfs tachtigen. At ter op de mark een beesje an e voert wörd’n, een betje ôôld of een betje mager, dan wörd’n der à gauw e zeg, niks weert, zet ter mà A.P. op (Abraham Pachrach). Aj’ in die tied oaver de mark leup’n zag e der verscheid’n met A.P. en die gung’n àmoa op Hoolt’n an. Ééne Hoolter Jödde is ter mà wier e kömm’n uut de “vernietigingskamp’n”. De Kiete van Gazan, zô neum’n ze’m. Wat den keerl àmoa met had e maakt, det woj’ neet wèèt’n, zô verteld’n de ôôld’n. Doar wörd’n oaver e zwèèg’n, mà wiej wuss’n det te spuit’n had e had van Josef Mengele. ’N dèird’n dent miej in gedach’n kump is Mevrouw de Haas-Boekbinder. Een klein ielig mèènske, mà vaste neet zielig. Ôk zie dreug de spoor’n van vedreet met zich met, mà was eeg’n met de Hoolter op het bejaord’ncarnaval. Joar’nlàànk zag ie ze nog in het Hoolt’nse straotbeeld. Noe we inmiddels à wier generaties veerder bint, bint het schaduuw’n uut vroggere tied’n diet oaver oe netvlies wààndelt. Het dut good dat ter noe, viem’nzestig joar noar de bevrijding, andach vuur is. Het dut miej dèènk’n an de Jödd’nkarke en an ne gemeenschap diet zô good as weg is uut het Hoolt’nse. Het dut miej dèènk’n an de woord’n van ’n ôôld’n Drent, diet uut de môônd van Abraham Berg optèèk’n; “Wiej bint ter met ’n paar daag’n wà wier. Wielle bint ôôle lèu.” Nôôit zôll’n ze Hoolt’n wier zeen. Schaduuw’n uut een veer verleed’n, diet nôôit wier bint e kömm’n. Het lèèm’n roast vedan. Hèèl, hèèl lange e lèène, misschien hè’k ‘m de vôôln wal is uut de bokse rèèdne. De gedach’n bint neet scharp meer, mà toch. ’N ôôld’n David Kater, waardig schuf e duur mien beeld. Wis en waarachtig.

De Vèèrkàànte Viefkop.
 

Wiej hebt met ôônze stemme àmoal het beste vuur met Hoolt’n. Aj’ det in oe achterhèuf hôôld is ter met dit stemadvies niks mis. Disse kèèr hè’k ’t neet oaver de ôônderwarp’n diet ter in Hoolt’n spölt mà völle meer oaver de puppekes. In het bezunder, de Hoolter puppekes. Stel daj’ goat stemm’n op de SGP. Ie könt ter vanals van zegg’n mà duudelijk bint ze wà. Zie hebt gen Hoolter en gen vroole op de lieste stoa. Trouwens ôk biej de ààndere pertiën bint de vroole mà dunne zèèit. Aj’ dèènkt det de SGP vuur de kômm’nde vèèr joar ’n dienst uut möt maak’n, dan dooj’ de Hoolter stemm’n gewoon noar Mark Voortman, nummer dartig van de lieste. Het is wenn’ mà, loawe eerlijke weer, zôônder de Russ’n haw we ’n oorlog ôk neet e wunn’. Goa we veerder met de PvdA. Zie hebt De la Haye ne plaatse loat’n duukeln, mà hij blif wà binn’ boord. De stemme van de Hoolter rôôi’n möt goan noar Rob Meijerink, nummer vèère van de lieste. Verôônderstel det ze in zwoar weer komt, dan möj’ zörgen det de beire Hoolter kandidaat’n nog een betje steun an mekaar hebt. Het CDA is appeltje eitje. De Hoolter stemm’n goat disse kèèr noar Cornelissen, nummer vieve van de lieste. At ze ne zetel in möt lèèvern, möj’der vuur zörg’n det hij der in kump met vuurkuurstemm’n. Ja en dan wördt’ moeilijk. Gemeentebelang. Nach’n hè’k ter van wakker e lèèg’n. Netuurlijk, zie hebt ne Hoolter liestrekker, doar hooi neet bange um te weer. Doarumme is uuteindelijk de keuze völl’n op Henk Vincent (van Hendrieks). Ne röstigen keerl met joar’nlàànk ervaring in de Markelse road. Zô hôbbele wiej vedan noar de CU. Ie könt good zeen det ze in Hoolt’n neet zô fièn meer bint. ‘N èèrst’n Hoolter steet pas op de vieftiende plaatse en den krig de zèèg’n, Gerrit Hulsman (Noaberhuus). Hij möt in de road, ààns is Hoolt’n ôk neet vertèègnwoordigt in det blok. De leste pertieje in disse riege is de VVD. Zôl’n ze greui’n, noet Jan Blaauw biej de Kouw an ’t töuw löp? Loaw we der op gokk’n. Wiej wèèt woet ze vuur stoat. Op ’n greui doo we de stemm’n noar Frans Noorddam, nummer vèère van de lieste. Zo den cirkel is rôônd. Hoolter aj’ zô stemt maj’ der van uut goan, daj’ met vuurkuurstemm’n, ach tut nèèng Hoolter in de nieje road könt krieg’n en die heij’ keihard nèurig. Dooj’t ààns dan heult’ met zesse schôône op. Noe kan ‘k miej vuurstell’n det de Hoolter vroole zich te kort e doane veult. Doar is wat an te doon, alle Hoolter stemmt op de èèrste de beste Hoolter vrouwe diet op de lieste steet. Mà dan wal àmoa, het maakt miej neet uut, aj’ mà hen stemm’n goat. Neet stemm’n is stemm’n vuur Riess’n. Wis en waarachtig.

De Vèèrkàànte Viefkop.
 

Het Stichtingsbestuur heult de zaak'n strak in eeg'n hàànd. Niks gen geouwehoer met Riess'n. Gewoon oen eeg'n bèuntjes döpp'n. Doar veuilt alles vuur te zegg'n. Toch kan 'k miej vuurstell'n daj' op zien minst'n een lusterend oor könt hemm'n. Goeie road is duur, vandaage an' dag en aj' det zôônder veerdere kost'n könt krieg'n is det allèène mà met e nömm'n. Ôk het Stichtingsbestuur möt neet dèènk'n det de bèume tut in' hemel greuit. Het lik ter noe op dat ze näns wat op uut doot. Ik lèèz'n tenminste det ze ôôndertuss'n beslist hebt det 'n naam van het nieje Hoolter huus, “Kulturhus Holten” wördt. Ne weereldvrèim'n naam vuur Hoolt'n. Ne naam dent eerder drèèmpel verhôôgend as drèèmpel verlèègend warkt. Noe blif het kiez'n van ne naam altied moeilijk en doarbiej geeldt ôk nog, zô völle mèèns'n, zô völle zinn', zô völle wörste, zôvölle pinn'. Mà toch, in dit geval is dit neet allèène iets van het Stichtingsbestuur, det könt ze wà dèènk'n, mà zô is het neet. Het is toch de bedoeling det hèèl Hoolt'n gebruuk geet maak'n van det huus. Hèèl Hoolt'n en de vrèim'n möt zich hier thuus veul'n, ôk de grötste kultuurbarbaar'n. Het is toch neet de bedoeling det allèène de hôôgheid hier noar binn' löp, mar ôk ôônze jeugd en de gewone man der gebruuk van maakt? Doarumme möt den naam duur de Hoolter bedach word'n. Ie gèèft mà één kèèr, vuur hèèle generaties làànk, ne naam. Vuur mien part schakel ie de Ôôldheidkamer der bie in of wat dan ôk. Komt met een vuurstel, woet uut e kèuz'n kan word'n. Det nieje gebouw verdeent ne môôi'n naam en neet het kluurlôôze “Kulturhus Holten”, woer ter darttiene van in' dozien goat. Al eerder bint ter naam'n an e drèèg'n. Herhaal'n hef hier gen zin, mar een paar ààndern diet miej te binn'scheet, Kultuurhuus De Denneboom, met ne verwiezing noar het hèèle ôôle gemeentehuus of Kultuurhuus De Zwaan met ne verwiezing noar den prachtigen tèègel det in het gebouw zit. Zô bint ter vaste nog wà môôie naam'n diet rech doot an de cultuur en geschiedenis van Hoolt'n. Loat het Stichtingsbestuur wèèt'n wat volgens oe de naam zôl mött'n weer. Het nieje darpshuus is vuur ôôns àmoal. Doar möw we ôôns àmoal thuus veul'n en neet allèène een bestuur. De Kèune op 'n Beelt möt grèuts weer at ze straks wier stoat te glemm'n vuur het Kultuurhuus De Weggestapel, noar het aldereuldste kasteel van Hoolt'n, ik neume mà ne ziedstroate. Kulturhus Holten, nen nikszeggenden naam, mà wie wèèt kump ter niks ààns uut de busse en zöw wet ter met mönn' doo. “Kultuurhuus Holten”. Mà zôj 't dan astebleef nog op zien Hoolt'ns will'n schriem'n. Wis en waarachtig.

De Vèèrkàànte Viefkop.
 

Dartig april, koneginnedag, vèèr mei, dood'nherdèènking en op vief mei ôônze bevrijding, viem'nzestig joar e lèène. Det mag neet ongemarkt vuurbiej goan. Hoolter, det möt een onvergettelijk môôi fees word'n. De Stichting Viering Nationale Feestdagen en Welcome again Veterans, www.come.to/wavHolten.nl bint ter al een joar volop met gangs um der iets môôis van te maak'n. Det doot ze neet allèène. Ôônder meer, vereeniging'n as de Oudheidkamer, de BAF, HMV, de MAC, OCH, de Atletiekvereniging, de Horecavereniging en de Fienpreuvers, bint ter drôk met, um dit gebuur'n onvergettelijk te maak'n. Rekkent ter op det Hoolt'n op de kaarte wördt e zet. Het herdèènk'n van alle oorlogsslachtoffers, woerôônder ôônze Canadeez'n en het vier'n van ôônze vriejheid, is iets wat ôôns nog altied noa an 't harte lig. Het zôl disse kèèr, wal is vuur 't leste könn' weer det ter nog Canadeese suldoat'n noar Hoolt'n komt. In ieder geval stoat ter op vèèr mei wier duuzenden mèèns'n op 'n Canadeez'n Karkhof. Völle vereniging'n doot met an dit bezundere herdèènkingsjoar. De Ôôldheidkamer schèènkt terech de kômm'nde tied völle andach an de Hoolter Jödd'n, diet in' oorlog bint vermoord. Zie kômt met ne speciale tentoonstelling. Wiej zölt wier ôôle lèègervoertuug'n in Hoolt'n zeen. Doar kump ne lèèzing oaver Hoolt'n in oorlogstied. HMV is ter as altied biej met de aubade en de taptoe. De atletiek haalt het vriejheidsvèur op uut Wagening'n. OCH spölt een oorlogsstuk. De jongs van de BAF uut 'n Bèusebarg bint, as warkgroep van de Canadeez'nroute commissie, gangs met iets hèèl bezunders, ne fiets/autoroute langs alle Hoolter oorlogsherinneringen, met ôônderweg, oorlogsuutbeelding'n. Ne toch duur 't darp, duur 'n Bèusebarg, oaver de Borkeld, 'n Hoolterbarg en Splôô, langs versierde boerderiej'n, buurt'n en stroat'n. Kiek mar is op de website www.canadezenroute.nl. De Fienpreuvers en de horeca maakt het met mekaa gezellig op de Kalfstermanswèire. Zô kan 'k nog wal een tiedje duur goan. Um kort te goan, hèèl Hoolt'n dut met. Hèèl Hoolt'n zal der feestelijk uut zeen met versierde stroat'n. Want wat ter ôk gebuurt, dit fees geet duur. Doar is allèène één grôôt prebleem en det is het geeld. Al die feestelijkheed'n kost völle geeld. Ôônze gemeente hef zien portie à touw e zeg en ôk langs kanaal'n van donaties is ter ôôndersteuning. Allèène in disse tied van, de hàànd op de knippe, is het nog völs te wèinig. Doarumme Hoolter, noe is één kèèr neet vuur 't buut'nlàànd, mà gewoon vuur ôôns zelf, vuur een machtige viem'nzestigjoarige herdèènking van ôônze vriejheid. Loaw we der met mekaa een fees van maak'n en gèèft waj' miss'n könt vuur dit grôôte vriejheidsfees in Hoolt'n. Vuur de Candeez'n, zie hebt ôôns ôk neet loat'n zitt'n. Loat de organisatie neet zitt'n met een gat in de begrôôting. Trekt de knippe en stort op rekkening 328561894 van de SVNF. Loat zeen det in Hoolt'n alles kan as 't möt en vuural noe 't geet um ôônze Canadeez'n. Alle klèine betjes helpt, ie doot toch ôk met! Ne joarlijkse machtiging mag ôk. Rekkening 328561894, o.v.v. Vuur de Canadeez'n. Aj'n tweed'n wilt weer möj' noe stort'n, want 'n èèrst'n bin ik. Wis en waarachtig.

De Vèèrkàànte Viefkop.

Wiej veult ôôns één grôôt Kèunevolk, met de Kèune op ’n Smidsbeelt.

De kôôrssen lôôpt op. Ôônze jeugd, Dieks van ’t Bulleke, de Vökke en Beesje Beesje, iedereene warkt zich de kop rôôd en de vingers blaauw, um de carnavalswaag’ns mar op tied kloar te krieg’n. In disse daag’n van keulte, schnèè en ies is det neet het allerfijnste wark. Neen, det versier’n möj’ neet ôônderschatt’n. Het is ieder joar wier, moand’n làànk, pôkkeln in kôôle schuur’n, zôônder daj’ op de vuurgrôônd kômt. Daj’ doarbiej zo of en touw een opwarmertje nemt is vanzelfsprekk’nd. De jonge lèu vindt het nog altied môôi en zô bint de zèumhonderd leed’n van de Fienpreuvers àmoa bèèzig um vuur eur eeg’n club de èèrste pries weg te haal’n in’ Kèunedarper optoch. Doarbiej geet’ nog meer um de kammeroadschap en het plezèèr wat ter an wördt belèèfd. Op de zittingsoamde van de Fienpreuvers bint de zaal’n of e laai’n met jonge lèu. Het is dan ôk gek aj’ heurt det in Hoolt’n niks zôll könn’. Vuur vèèrtig joar trugge zeer’n de ôôld’n det carnaval in Hoolt’n neet kôn. Noe rit ter nen optoch van meer dan honderd nummers duur Kèunedarp. Vuur twintig joar trugge wörd’n der e zeg det een grôôt fees in Hoolt’n neet kon. Det was allèène mà mèuglijk in de plaats’n um ôôns hen. Noe hew we ôônze eeg’n Kèunefeest’n. Ôônder de vlagge van de Fienpreuvers wördt’ e drèèg’n duur de jeugd. Zie warkt ter àmoa keihard an met, um het Hoolter geveul in stàànd te hôôl’n. Och en dan gebuurt ter ôk wal is dinge diet neet möt. Dinge diet neet valt good te kuur’n. Det wèèt ze zelf ôk donders good. Doar warkt ze ôk wal an. Netuurlijk möt de euldere generatie biej stuur’n. Zô is ’t altied al e wes. Mà zôônder de jonge generatie köj’niks beginn’. Prins Soer van de Walboer en zien’ Adjudant Blàauw, die hooft dit joar niks te doo. Zie hooft allèène mà te zörg’n det ze oaverà op tied bint en de Road van Elme in ’t gareel hôôlt. Dôônderdag ’n slöttel op haal’n, vriejdag, bezundere Hoolter opnemm’n in de “Huisorde van de Fienpreuvers” Zich op carnavalszoaterdag as grootvorst’n duur Kèunedarp loat’n riè. Zundag met’ hèèle spul noar ‘n optoch.in Dèimter, um ten lange lest’n ’n slöttel wier in te lèèvern biej de börgemèister. Zô links en rechts heurj’ nog wal is det carnaval det is miej niks weert en det is ’n ieder zien good rech. Aj’ echter in de kökk’n kiekt van de Fienpreuvers, dan wèèj’à hèèl rap det het neet allèène fees is en det het àmoa neet vanzelf geet. Het bestuur is ieder joar wier bliej, at alles zôônder ongelukk’n is verleup’n. Viem’ntwintig commissies bint het hèèle joar duur gangs met carnaval. Netuurlijk bint ter ôk wà tied’n, det’ wat röstiger is, mà dan bint ze à gauw wier bèèzig met vief mei, de kèunebar en de kèunefeest’n. Het geet àmoa neet vanzelf, wis en waarachtig neet.

De Vèèrkàànte Viefkop.
 

Mèènsen, wakker word’n. Van alle kàànt’n woj’ benèuidert en an e sprökk’n. Ie zeet ze op de televisie of heurt ze op de radio. Zie wèèt àmoal wier precies hoe ‘t möt. De aktiegroep’n bint wier aktief. Zie loat zeen det het zwoare vrachverkèèr nog altied dwars duur Hoolt’n hen dôôndert. De SGP-ers bewarkt ôôns um op eur te stemm’n. Zie goat vuur zèum zetels. Zie goat vuur Hoolter stemm’n. Ne stemme op eur is ne stemme vuur’n rôôndweg. Wiej möt dan mà vuur leef nemm’n det, ze op Karsoamd, tèèg’n het herdèènk’n van de suldoat’n bint. Det is ne zwoare pries, mà zô at ze dan klasjenèèrt, doar köw we niks an doon, zô steet’ in ‘t Beukske. Hetzelfde Beukske, woet de CU en ’t CDA ôk noar lèèft. Het lik ter op daj’ der alle kàànt’n met uut könt. Het is neet ààns. Wie loat ’n ieder in zien weerde. Zèum zetels vuur de SGP, det wördt bezuunigen vuur de ààndern. De CU schuf à wier dichte tèèg’n de “mannenbroeders” an. Gelukkig köw we kiez’n. De Koe van de VVD, de Kouw in’t Hoolt’ns, an ’t töuw van Jan Blaauw en de SGP, löt ôk zeen det det verkèèr, buut’n Hoolt’n umme, langs ’t spoor möt komm’n. Vrouw Tijhof van de PvdA zeg, met ’n stoal’n gezichte, det die zwoare vrachwaag’ns mar oaver ’n Kol duur de HJ Wàànsinkstraote möt. Biej eur eeg’n kiezers vuur de duure hen. Het is mà net waj’ wilt. De ààndere pertién hôôlt zich op de vlakte. De politiek begint, juus in disse daag’n, vief wekke vuur de verkiezing’n, te bezuunigen. Drei’nvèèrtig compjoeters vuur nèèg’ntwintig volksverteeg’nwoordigers bezuunigt ze weg. Gen bitterball’n en gen bôrrels meer. De wethoolders ter Schuure en ter Keurs, bezuunigt ôk met. Zie wadd’n op ’t Prinsenbal met ééne vrouwe. Goat zô nog meer èèm’n vedan. Àmoa dinge diet, aj’ der good oaver noa dèènkt, de gewoonste zaak van de wèèreld bint. Den één’ barbequie, den mag van miej wà bliem’n, mà dan zô ’k wà geerne zee det ze al die ààndere duure snoepreisjes ofschaft. Één zo’n reisje en ie zit à gauw op viem’ntwintigduuz’nd euro. En wat dèènk van à wier een niej ôônderzeuk, oaver ’t centrum van Hoolt’n. Doar ligt à, ik wèèt neet hoe völle, duure rapport’n in de laa. Het lik ter op det wat ze met de hàànne rech zet, met de kôônte wierumme stôôt. Toch et ze oe disse daag’n àmoal uut de hàànd, mà pas op, zô gauw at ze ’t wethoolders pluche roekt, kan alles opzied goan en driet ze oe ne moand later röstig op ’n kop. Det is politiek. Toch möw we hen stemm’n. Woerop, det maj’ en möj’ zelf wèèt’n. Woerumme, umdat det een rech is, wat ze lange neet oaverà in de wereld hebt. Wis en waarachtig.

De Vèèrkàànte Viefkop.