• Leven in Holten
  • Contact
  • Leven in Holten
  • Contact

Meer vroole in de Road

2
GEDEELD

Moandenlàànk zit ie der tèèng’n an te kiek’n, volgende wekke is ’t zô veer. Wie meugt hen stemm’n. Oaverà zeej’ de plakkaat’n hang’n. Zelfs ôônderweg lacht ze oe, vanof de stoepe, touw in de auto. Onwillekuurig môs ik trugge dèènk’n an de anplakbiljett’n van eerder. Het gries oaverheers’n en de keerls uut de politiek kekk’n oe hèèl ernstig an, um oe te wiez’n op de stemplich. De keerls ja, want vroole wadd’n der praktisch neet te bekenn’n. In latere joar’n is det een klein betje biej etrökk’n, mà nog altied völs te weinig. Wiej hebt in ôônze gemeente ach pertiën en doar zit gen een’n vrouwelijken liesttrekker biej. Dus zöw we ôk disse kèèr lèèger op de liest’n mönn’n kiek’n. Want Hoolter, dörft is vuur ne vrouwe te kiez’n en det kan makkelijk zat, met vuurkeurstemm’n. Het motto vuur de kommende wekke is, kiek op de lieste en kiest vuur de èèrste vrouwe uut oene pertieë. Vuur de vroole möt det hèèmoa gen punt weer. Vroole kiest vuur vroole en keerls vuur keerls. Het plaatje zut er dan à gauw fiftie fiftie uut. Mà het kan nog better at ôk de keerls oaver hun eeg’n schaduw springt en dörft te kiez’n vuur de èèrste Hoolter vrouwe op de lieste. Doarumme zal ik die vroole èèm’n in het zunneke zett’n, te beginn’n biej de SGP. ’N èèrst’n tèèng’nvaller is ter à, doar steet er gen ééne op, wat zeg ik, doar steet zelfs gen één’n keerl uut Hoolt’n op. Zie doot dus kennelijk àllèène in Riess’n met. Doar zölt toch wà vroole op de liest’n stoan? Gelukkig biej het CDA, de allerèèrste vrouwe op de lieste Evelyn Ezendam-Groenewal op de nèèngde plaatse. Wiej goat duur noar de CU, Alinde Kogelman-Laarman, ôk pas op de nèèngde plaatse. Àj’t good bekiekt völs te lèège, mà doar köw we verààndering in breng’n. Wiej keerls hebt er nog neet völle van begrepp’n. Gelukkig, Gemeentebelang hef Jannette Haverslag Pekkeriet op ne verkiesbare plaatse stoan. De PvdA dut het nog better, op nummer tweie, Renate Janssen-Niehof, dus allePvdA-vroole, ie wèèt wat oe te doon steet. De VVD blif neet völle achter, vanof de bord’n zeej’ eur schittern, Elsbeth Deijk op nummer dreie. D 66 geet het doon met Julia Hof op zesse en Groen Links slut de riege met Loes ter Harmsel van Lingen op nummer dreie. Ie zeet het Hoolter en Riesner, vroole genog op de verschillende liest’n. Noe is het an ôôns àmoa. Vroole in de road, wiej hebt zelf het potlôôd in de hàànd. Maakt van oen stemrech ne stemplich, àj wat wilt verààndern in de gemeentepolitiek. Één dinge steet as ne poal boam’n water, doar möt meer vroole in de Road. Goat stemm’n, want in Riess’n goat ze àmoa. Iedere stemme uut Hoolt’n is winst vuur ôôns darp, wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.