• Leven in Holten
  • Contact
  • Leven in Holten
  • Contact

Laffe hette, grof vuil en vakààànsie.

0
GEDEELD

Puffend en bloazend kôm ie tut stilstàànd. Het Diekerhookse fees zit ter op. Bôh fôi toch, wat ’n hette, mà wat onmeunig môôi. Ik verspitse miej noe al op de zundagmiddag van de Kèunefeest’n, want ech woar, Bôh fôi toch kump noar de Kalfstermanswèire. Vuur det’ zôô veer is möw we èèrs nog kiez’n tuss’n het Splôôse fees en de triatlon. Hoolt’n, “the place to be” zô stunt ter in de kràànte. Ikke zeuk’n, wat vukke plees oj’ dan ’t beste kônn’n gebruuk’n, mà det stun der neet biej. Het maakt ôk neet zô völle uut. Zie hebt ter bèire wà vuur e zörgt, daj ’t oavertollige water kwiet könt. Aj’ hôôlt van ne môôi’n optoch duur de natuur, köj’ biej bèire an oen trekk’n kômm’n. Biej bèire köj’fees hôôl’n met de Reeperbahner Stimmungmacher en op moandag köj’ op bèire plaats’n met doon an’ optoch vuur lèuige portemenees. Splôôse fees hef één dinge vuur en det is het Brookduo. ‘Soamds de keerl en ‘smäns de keerl, det veuilt neet met, met al die hette. Zô kôj’verscheid’n Diekerhookers moandag op de fietse zeen um lôch te happ’n. Wat een laffe hette. Zelf haw ’t ôk neet meer. Wiej wadd’n touw an vakàànsie. Ja lèu en wie meugt op vakàànsie!. Vuur ’t èèrste in viem’nzestig joar geet de Hoolterkràànte met vakàànsie. Zes wekke möj’ zôônder en dan goawe wier, met frisse mood, vedan. Wiej zoch’n frissighèid. Die frissighèid hoppe wiej te vinn’n an de Noordkaap. Dus at iedereene zit te zwèèt’n in Riess’n, ’n Haag of nog veerder weg, hoppe wiej te geniet’n van ne frisse wind in ’t hôôge Noord’n. Eind augustus biw we der wier. Tèèg’n die tied möw we mar is een kèèr goan kiek’n woet’ in Riess’n is. Ie heurt ter neet zô völle meer van. Heb iele ôk het geveul det Riess’n völle veerder weg lig dan vuurig joar um diss’n tied? Doar wi’k de kômm’nde wekk’n is good oaver noa dèènk’n. Zô ‘k ter noe tèèg’n an kieke, hè ‘k het geveul dat ze ôôns, met dit college, biej het grof vuil hebt e zet. Det lik trouwens wà ne besmettelijke zeekte, want ôk in’ Haag hebt ze nog altied neet in de smiez’n wat de kiezers wilt. Wiej zölt het mönn’n ofwach’n, mà het lik ter good op det de VVD geet regèèr’n met de PvdA, Greun Links en D 66. Aj ’t snapt maj ’t zegg’n. Het CDA zet de hakk’n in ’t zàànd en de PVV wördt neet vuur vol an e zeene. Vuur de gewone man is het neet te snapp’n. Wat maakt het ôk àmoal uut. Geniet van de komm’nde daag’n, blieft gezôônd, völle wille, ne goeie vakààànsie en vuur iedereene, komt good wier noar huus. Wis en waarachtig.

De Vèèrkàànte Viefkop.
 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.