Hoezô vuuruut kiek’n

1

Een verhaaltje schriem’n. Net àj’ der oaver noa dèènkt, geet er een tingeltje op de telefoon. Mèèstal ne botsing of ne file op de A1. Ie schrikt, een ongeluk op de Okk’nbrookseweg. De schrik slöt oe um ’t harte, àj’ möt lèez’n det er twei slachtoffers bint. In disse tied, van modern telefoonverkèèr vleegt de berichtjes oaver oen scharm, heij’t al e heurt? Zô gangswieze kriej’ de verschrikkelijke woarhèid ôônder ôôg’n. Twei jonge jongs, zô mar in één kèèr vôt. Ie zölt de bosschôp mar in huus krieg’n. Ie krimpt in mekaa en veult de deepe piene. De kràànt’n, ne foto, met een buske bloom’n, as stille getuuge. Oaverà wördt er oaver eproat. De hèèle regio lèèft met, met de getröff’n femilies. Woerumme, dit mag toch neet, zô jôônk nog! Iedereene zoch op zien eeg’n meniere vertrèusting. Voetbal is in één kèèr neet meer belangriek. Jonge lèu zeukt mekaar op, um het rampzalige gebuur’n te verwark’n en krach te vind’n. Het zal vuur altied ne deepe krasse weer in het gehèug’n. Ôôle wôônd’n wordt lös e trökk’n. Ie beseft in één kèèr det er in iedere generatie ongelukk’n gebuurd bint, diet noe noa boam’n komt en wier extra zeer doot. Bram en Tim zölt vuur altied in één’n oasem word’n eneumd. Wiej stoat machtelôôs langs de kàànte en veult met, met de getröff’n femilies. Ôôndertuss’n blieft de bericht’n binn’n dwarreln, teglieke met de vallende blaa, as tèèk’n van vergàànkelijkhèid. Vuuruutkiek’n is wà hèèl makkelijk um te zegg’n. Um oe hen kiek’n en zeen of ter mèèns’n bint diej’ könt help’n, dè ’s völle zwoarder. Wiej hebt de neiging um de gedacht’n van ôôns of te zett’n. Wiej zeukt de warmte, in disse tied van Sunterkloas en de Karsdaag’n, diet vuur de duure stoat. Det mag ôk en wiej meugt dàànkbaar wèè, vuur alles waw we nog um ôôns hen hebt. Wiej meugt vuuruut kiek’n noar het nieje joar en hopp’n op de môôie dinge diet het mèugelijk zal gèèm’n. Wiej könt neet ààns, wiej möt vedan, mà toch, biej het vuuruutkiek’n, verget neet um oen hen te kiek’n, want het verdreet is vaak körter biej as dàj’ arg in hebt, wis en waarachtig.

De Vèèrkàànte Viefkop.

1 reactie
  1. Yvonne Buitendijk Pieterman
    Yvonne Buitendijk Pieterman zegt

    Leuk en mooi verhaal. Kon het goed lezen. Ik als westerling uit Amsterdam nu wonende elders in zuid Holland. Vroeger als kind mijn jeugdjaren doorgebracht in Holten waar mijn moeder was geboren. Geweldige tijd gehad. ?

Laat een antwoord achter

Uw e-mailadres wordt niet gepubliceerd.