• Leven in Holten
  • Contact
  • Leven in Holten
  • Contact

Gekke Henkie

0
GEDEELD

Heij’ de proatprogramma’s e volgt op tillevisie? De mèining’n vleegt oaver de tillevisiescharm’n. Vuur een joar of wat wörd’n Theo van Gogh of e slacht. In de ôôg’n van sommigen had e het er noar e maakt. Hetzelfde geeld’n vuur Fortuin. Hetzelfde geeldt ôk vuur de lèu van Charly uut Parijs. Disse lèu die maak’n spotprèèntjes, doar lust’n de hôônne mangs gen brôôd van. De Heer’n uut de politiek wadd’n der neet bliej met, mà leut’n het oaver zich hen goan. Zô heurt het ôk en det geeldt vuur iedereene. Het krääntje wat ze uut gaff’n had nen oplage van zestigduuzend in de wekke. Eerlijke hà ‘k ter nog nôôit eerder van e heurt. De lèu doar wörd’n bewaakt duur de plietsie en toch wörd’n ze an e völl’n duur twei man, diet zich neet thuus veult in ôônze meniere van lèèm’n. Zelfs met plietsie vuur de duure konn’n ze zô noar binn’n lôôp’n um twaalf mèèns’n te vermoord’n. De oplage van de kràànte scheut in één kèèr noar één miljoen. Het gif te dèènk’n. Het was in Parijs. In één kèèr zag ie alle bobo’s metlôôp’n in ne massaal’n optoch tèèg’n dissen anslag. Het is te hopp’n det de ôôg’n lös goat en daw we inzeet hoe keihard of disse lèu bint. Kiekt noar Afrika, Amerika, Syrië en nog völle meer plaats’n. Het bint er dan misschien mà dartigduuzend, mà zie legt de wille op an miljoen’n ààndern. De politiek, diet à joar’n waarschouwt en zelf à joar’n möt word’n beveiligd umdet ze zich keihard opstelt tèèg’n disse fanatiekeling’n, wordt vaake an de kàànte e zet. De seldoat’n inzett’n op belangrieke plaats’n, kan neet, umdàj dan te völle een plietsiestaat kriegt, heur’n ik de geleerd’n zegg’n. In Fràànkriek bint ze wakker, doar wordt noe tienduuzend man van ’t lèèger wal in e zet. Het zal de lèu doar een veiliger geveul gèèm’n. Zô lange at het nog zô is det er lèu bescharmt möt word’n tèèg’n kôôgels uut wat vunnen hook dan ôk, möj’ die middeln inzett’n, zô lange as det nèurig is. Börgemèister Aboutaleb hef zien nekk’n uut e stökk’n vuur de bevolkingsgroep woet e uut vuurt kump. Zôl e noe nog wà zô oaver stroate könn’n goan? Zölt er nog meer pertiën kômm’n diet strengere rèègels wilt vuur iedereene, diet zô mà wat schreeuwt. Wördt het neet is wier hôôge tied dat er meer en better op vanals wördt controlèèrt. Goaw we der neet völs te völle vanuut det alles vanzelf wà lös löp. Ie zölt zeen det de politiek wier opschuf, duur al disse gebuurteniss’n. Het wördt tied det ôôns làànd ôk duudelijk löt zeen woet het vuur steet en het neet allèène löt biej vuuran met lôôp’n in de mars vuur Charly. Wiej möt uutgoan van ne hôôp goodwillenden, mà die rotte appels möt in nen aparte màànne. Àj’ det neet inzeet lôôp ie binne’n de kortste kèèr’n met in ne mars vuur gekke Henkie.
Wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.