Diekerhook en ‘t Hoolterbrook vuur honderd joar trugge

0

Àj’ vanof Splôô op ’n Diekerhook an riedt zeej van veer of à de Diekerhookse mölle. As een pareltje steet e te stroal’n in het wiedse landschap. Vlak biej de mölle zeej’ de môôi ingerichte schoole met de ôônderwiezerswonning. Doar woet ’n Splôôdiek zich kruust met de grôôte weg van Hoolt’n noar Dèimter, zeej’ rechts de harbarg “Het Bôônte Peerd” en links de villa’s, “Oldersheem” en “De Rinkelder. ” Een smal streuitje löp veerder tut het spoorstation van ’n Diekerhook. Het Bôônte Peerd is een ôôlderwets ingericht’n harbarg, met der vuur ne machtigen grôôt’n Linnebôôm. Het uuthangbord, met een grôôt bont peerd er op, zit an de schuure etimmert. In de villa “Oldersheem zit een internaat vuur mèeirkes, ôônder leiding van Mevrouw Boissevain. De mèeirkes kriegt er les in theorie en praktijk van tuinbouw, greunte en vruchten, het verzörg’n en kweek’n van bloom’n en plàànt’n en het kokk’n en weck’n van allerlei greunte en vrucht’n. Van Diekerhook köj’ kôôgelrech op Hoolt’n an. De weg löp èèm’nwiedig an de spoorliene. Het is echter völle mèuier um oaver de ôôle Dèimterweg te goan, dwars duur bouwlàànd, bos en heetvlaktes. De weg is brèèd en was vrogger de Postweg tuss’n Amsterdam en Hannoover. Op sommige plaats’n is de weg nog net zô brèèd as vrogger. Langs die weg heij’ nog het boer’narf van “Lokin”, woet een bord höng met ne kastelein der op, um zô de klàànt’n noar binn’n te krieg’n. Het bord is ter à lange neet meer. Veerder op Hoolt’n an zeej’ de môôi begreuide hèugtes van ’n Hoolterbarg. Wiej goat èèm’n trugge, richting het station van Diekerhook. Vuurbiej de spoorliene begint het Hoolterbrook en ie zeet àllèène mà gröslàànd. Vanuut Hoolt’n köj hier ôk kômm’n oaver de Grintweg noar Loarne en oaver ’n Darperdiek. Het landschap is hier völle ààns as in de rest van Hoolt’n. Ie zeet hier zommers het rôôd bôônte vèè, grazend in greune wèid’ns, umgèèm’n duur tochtslèute. Ie zeet de boer’n diet gangs bint met het hèui. Alles dut hier een betje Hollàànds an in tèèng’nstelling tut de hèugtes, diet in de veert’n ligt. Oaverà zeej’ het opgoande hoolt langs slèutjes en stèègjes. Veerderop langs ’n Darperdiek en Schollemansdiek kom ie in de buurtschap Loo, ôônder Battum. Oaver de Ôôle Bekke lig de schilderachtige Pothaarsbrugge, geneumd noar het boer’narf det er vlak biej lig. De weg löp veerder duur het Battumse Venne, woet nog rest’n bint van het ôôle kasteel Arkesteyn. De zuudelijke grèènze van ’t Hoolterbrook löp geliek met de Schipbekke. Het westelijke gedeelte is kanalisèèrd en an bèire kàànt’n begreuid met denn’n, woet môôie bospèèdjes duur lôôpt. Het is een paradies vuur vôgels. De naam Snatergatsbosch zeg alles. Meer noar het ôôst’n is de Wippertsbrugge oaver de Schipbekke de verbinding tuss’n Oaveriessel en Gelderlàànd. Het is ter môôi en ie möt er tied vuur uuttrekk’n um het te bekiek’n en te waardèèr’n.

 

De Vèèrkàànte Viefkop.

Laat een antwoord achter

Uw e-mailadres wordt niet gepubliceerd.