• Leven in Holten
  • Contact
  • Leven in Holten
  • Contact

Dèimter zôl der grèuts op weer

0
GEDEELD

Het lig wier achter ôôns. Het lig wier oaverà, de confetti. Neet iedereene is ter bliej met. Völle Hoolter vroole möt disse daag’n extra stofzuug’n um al die confettie wier van de vloere te krieg’n. Duuzenden hebt wier genött’n van de Kèunedarper optoch, dent zich met tachtig groep’n, kan mett’n met de grötst’n uut de buurte. Genött’n van vèèr daage plezèèr. Èèm’n de zörg’n van alle dag achter oe loat’n, zôdaj’ der wier vol gas tèèng’nan könt. Ie möt oe petje of nemm’n vuur Prins André en zien’n adjudant Wilco. Zie wörd’n vanof dôônderdagoamd hen en wier e slept, um het de Kèunedarpers mà zo good mèuglijk noar ’n zin te maak’n. Petje of, ôk vuur het gemeentebestuur, vuur de metwarking, diet de Fienpreuvers kriegt. Toch kan det nog wà better. Vuur de zôvölste kèèr hôôlt ze ne roadsvergadering op ’n oamd, det de slöttel of möt word’n e gèèm’n an de Prins. Det kan ààns. Netuurlijk bint bèire pertien wà zô metgoand, det ze der met mekaa uutkomt. Toch is het hèèl good um de köppe is biej mekaa te stekk’n en is good met mekaa te oaverlegg’n. Het carnaval is à lange neet meer allèène een feesje van Fienpreuverspett’n, mà van hèèl Hoolt’n en umstreek’n. Achter de scharm’n veult de organisatoor’n, al of neet terech, den als mà touwnemm’nden druk en een geveul van tèèg’nwarking vanuut de gemeente. Een geveul van kan det neet ààns of wi-j’ neet ààns? Det geveul möt uut de wèèreld. Doar lig wark vuur de wethoolder. Um mà wat te neum’n. Neuis de dinge, as het opruum’n van de rotzooi en het ofstemm’n van doatems, het ofsluut’n van de wèège, is onmeunig belangriek, de ruumte um waag’ns te könn’n bouw’n. De ôôlde febrieksgebouw’n goat tèèg’n de vlakte, mà de jeugd möt wà vedan. Môôie waag’ns bouw’n, diet dit joar in Dèimter de èèrste vèèr prieze weghaal’n. Dèimter diet onmeunig wies is met det Hoolter volk in zien’n optoch. Môôie waag’ns, diet de jong’n van de stroate hôôlt. Môôie waag’ns, woerduur kammeroadschap vuur ’t lèèm’n ontsteet. Hoolter jeugd, woet ze in Dèimter grèuts op zôll’n weer. Det mag neet verleuirne goan. De politiek kan doar met help’n, de politiek möt doar met help’n. En det is neet allèène vuur het bouw’n van carnavalswaag’ns, mar ôk ààndere organisaties zit verlèèg’n um ruumte um, spul op te sloan en op te könn’n bouw’n. Dèènkt mar is an de triathlon en de oop’nlôchtvuurstelling’n. Dus mekaa help’n. De hàànde in mekaa sloa, zô daw we grèuts blieft op alles wat er gebuurt in ôôns Kèunedarp, det noa dinsdag wier gewoon Hoolt’n heet. Netuurlijk, gebuurt er ôk wà dinge diej’ as euldern neet zô geerne zeet. Kiekt dan àmoal is ne kèèr wier in ’n speegel en dan kom ie der achter, daj’ ôk wal is wat e doane hebt woej’ minder grèuts op wadd’n. Jôônk weer is zô môôi en det binj’mar één kèèr. Wis en waarachtig.

De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.