• Leven in Holten
  • Contact
  • Leven in Holten
  • Contact

De ôôle Koneginne

0
GEDEELD

Het is gek, mà vuur miej is ter mar ééne ôôle koniginne. Het is ter van jongs of an in e proat en ik bin det nôôit wier kwiet e raakt. Det zölt meer lèu van de generaties van vuur en drek noar ’n oorlog hemm’n. De ôôle Koneginne Wilhelmina. Mien opoe en opa hadd’n der deepe ontzag vuur. Zie had Nederlàànd, vanuut Londen, via de radio, mood e gèèm’n in de duustere tied’n van ’n oorlog. Zie steet op mien netvlies as nen ôôle opoe, in ne bontjas, met nen aparte meniere van zwaai’n en lôôp’n. Of en touw zag ie eur nog wal is äns, achter een rèimke, biej de verjeurdag van eur dochter. Zie wonn’n in Apeldoorn op ’t Lôô. Doar schrèèf ze eur book, Eenzaam mà neet àllèène. Àj’ wèèt hoe grôôt of het doar is, dan möj’ oe wal àllèène veul’n. In 1962 is ze störm’n. Het làànd was in deep’n rouw. Zie nömm’n ofschèid van de mooder van ’t vaderlàànd. Onvergettelijk blif de begrafnisse, alles hèèmoal in het wit.Vanof den dag gen ôôle koneginne meer, mar àllèène Koneginne Juliana. As wichter wus e wiej neet ààns. Zie was de koneginne en ieder joar zunge wiej de vaderlààndse versjes vuur het ôôle gemeentehuus. Ieder joar trökk’n der duuzenden noar paleis Soestdijk vuur het joarlijkse défilé duur den paleistuin. Juliana en Bernhard bint er eur hèèle lèèm’n bliem’n wonn’n. Pas in 1980 gaf zie het stökske oaver an Beatrix. Juliana, vaake geklèèd in dezelfde bleumkesjörk’n as de mooders uut die tied. Zie was völle gewoner as eur moo en toen ze het stökske oaver gaf, was zie Prinses Juliana. De tied van Koniginne Beatrix is vuurbiej e vlèug’n en met eur kwamm’n de èèrste generaties van noar’n oorlog op lèèftied. Zie was völle zakelijker dan eur moo, mà hef het meer dan good e doane. Doar heiw we gen ne president vuur nèurig. Noa 32 joar wier nen oavergàànk van Koningin Beatrix noar Koning Willem Alexander. Het was àmoa machtig môôi te volg’n. Toch is het wal èèm’n wenn’n, Beatrix diet er altied pico model biej leup en Willem Alexander dent zien kapsel neet stief in ’t model hef. Gelukkig maakt Koneginne Maxima ne hôôp good. Zie zut er vorstelijk uut en hef een good stel harssens. Nee, ôônz’n Koning Willem Alexander hef de ôôg’n neet in de tässe had. Vuur het èèrst in dikke 120 joar heiw we wier ne koning en ne koneginne. Zie stroalt de nieje tied uut, diet het hèèle làànd bindt, ôônder de kluur van oranje. Het is àmoa nog wenn’n, mà het feest geet in Amsterdam nog wal èèm’n vedan, want de hoofdstedelijke ploeg is vuur de dèirde kèèr op riege kampioen van Nederlàànd e wörd’n. Noe zit ze met twei koning’n, Voetbalkoning Frank de Boer en Oranjekoning Willem Alexander. Woet een klein làànd neet grôôt in kan weer. Toch blif ter mar ééne ôôle Koneginne, Wilhelmina. Wis en waarachtig.

De Vèèrkàànte viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.