• Leven in Holten
  • Contact
  • Leven in Holten
  • Contact

Chauffeur van de baas

0
GEDEELD

Vuur een tiedje trugge zat ik te prakkezèèr’n, op ’n Zoerbarg, biej de Steen’n Bàànke. Neuis miej zat een eulder stel, een beukske te lèèz’n. Het blek ne dôômie uut Riess’n te weer. Miene gedach’n zweefd’n weg, noar een môôi wit lààndhuus. “Doar wônt noe de grôôte baas uut Riess’n en veerder noar de ààndere kàànte, op ’n Hoolterbarg, wont de dochter”, vertell’n ik ‘m. Toen ‘k ‘m zèère, wiet de grôôte baas dan wà môch weer, blekke de femilie good te kenn’n. Wie gung’n bèire vedan met oonze eeg’n gedach’n. Doar, op “Huize De Bergh”, wonn’n in de joar’n zestig en zèumtig mien’ baas. Völle Hoolter verdeen’n biej um ne boterham. Zelfs zien eeg’n dochter was biej um in diens. Den baas was lange neet makkelijkst’n, mà gek genog kôn ‘k merakels bes met ‘m duur eene duure. Verscheid’n kèèr’n hà ‘k de eere um ‘m in mien’ ôôle Simcaatje ’n barg op te vèur’n. Zô maak’n ik vuur de èèrste kèèr kennis met det deftige huus. Netuurlijk heur’n ie van de ôôle lèu wà det doar vrogger börgemèister Baron Van de Borch van Verwoolde had e wônt. Klein’ Teunis van de Stökker, hef wel is vertelt det hij de baron ’s oamds met ’n auto noar Verwoolde in Loar’n môs breng’n en dette dan biej nach en ontied, met dikk’n mis, det dache tenminste, oaver de zààndwèèg’n wier op Hoolt’n an môs. Hij en de börgemèister hadd’n genött’n van de gastvriejheid op ’t kasteel. Zô kon ’t gebuur’n det Teunis pas noa een paar kilometer in de gaat’n krèèg dette ne dook vuur de roet’n had zitt’n. De mist was in één kèèr ’n stuk minder. In het begin van die joar’n zèumtig trouw’n de dochter van mien’ baas en het fees wörd’n e heul’n op ’n barg. Wiej wadd’n àmoal uut e nèudigt en det was neet tèèg’n dôôvemansoor’n e zeg. Met de auto van Jantje O, ôônz’n vast’n vervoerder, gunge wiej richting Rooie Darp. Ôônderan ’n barg stunn’n de brèurs van de bruid, met walkie-talkies, het verkèèr noar boam’n te rèègeln. Wiej hadd’n drek in de smiez’n dat het hatstekke drôk was. Het grôôte lààndhuus zat propvôl met femilie, neuist’n en bobo’s. Doar kon gen mèinse meer biej. De wille was ter neet minder umme. Wiej vun’ mekaa in de garage biej het lààndhuus en doar wörd’n een deftig feesje bouwt. Wiej wörd’n bedeent duur de Vöskes. Die leup’n zô hard, det ze het blad met dràànk al mangs eerder leuig hadd’n as det eur leef was. An ’t èine van’ middag roll’n ie, zôônder walkie-talkies, vanzelf ’n barg wier of. Den bezundern middag hèw we of e slött’n biej de Jeante. Ôônz’n chauffeur was doar in gen dartig joar meer e wes. “Niks verààndert hier” heur’n ie ‘m zegg’n. Hij had de oamd van zien lèèm’n en veul’n zich met ôôns wier opniejs jôônk. Wis en waarachtig.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.