• Leven in Holten
  • Contact
  • Leven in Holten
  • Contact

Bedàànkt

0
GEDEELD

Ie wordt er stille van, zô völle lèu, diet de mèuite hebt e nömm’n um ofgelôôp’n vriejdag te kômm’n lustern in ‘t Kultuurhuus. At ze miej neet noar de môônd hebt e proat, vunn’n ze ‘t àmoa môôi. Zelfs vanuut België wadd’n ze e kömm’n um te lustern noar eur moodertaal. Vanuut Nieuw Zeeland en Indië kwamm’n de felicitaties binn’n. Ie wordt er stille van. Àmoa bedàànkt. Zolange à ‘k gezôônd magge bliem’n, goaw we gewoon duur en wie wèèt wat er àmoa nog te gebuur’n steet.
Wie we ôk meugt bedàànk’n, det bint de Belg’n. Zie hebt één of ààndern “haatprediker” het làànd uut e zat met ne Nederlàànds-Marokkaanse nationaliteit. Wat gebuurt er, zie zet ’m biej Maastrich oaver de grèènze. Det is noe Uuropa, de rotzooi biej de buur’n oaver de hegge smiet’n. Ie heurt de politiek zegg’n, zô gauw at e hier verkèèrde dinge dut, pakke wiej ‘m op. Det is toch een krom signaal wat Uuropa ofgif, noa alles wat er gebuurt is. Den hadd’n ze toch ôk noar Marokko könn’n stuur’n? Àj’ heurt wat de man uutkroamt, was de minste straffe wal e wes um ‘m zien Nederlààndse paspoort of te nemm’n. Het lik ter op det Uuropa gen tàànne hef en nôôit zal krieg’n. Ie wèèt wat er vrogger e zeg wörd’n. Zachte hèèlmèisters maakt stinkende wôônd’n.
Netuurlijk Rutte möw we ôk bedàànk’n, hij wringt zich in alle buchte um toch mà det referendum der duur te krieg’n. Det terwiel zô völle Nederlàànders doar ààns oaver dèènkt. Wiej hebt het met zien all’n volgens de wet of e stemt. Het zôl word’n e respektèèrt en dan goat ze der wier met an ’t piel’n. Hij zal der toch wal arg in hemm’n dat det wal is fataal kan weer vuur de kômmende verkiezing’n. De gewone man is ter kloar met, die wil veilighèid en duudelijkhèid.
Ôônze gemeenteroad möw we ôk bedàànk’n. Viem’nvieftighonderd Hoolter wilt de winkels op zundag lös. Het wördt van toafel e vèègt, met twintig tèèg’n vief stemm’n. Op zich neet verwôônderlijk. Opvallend is det VVD lokaal ééne stemme tèèg’n gif, net den een’n dent vuur een joar of wat ôk al uut de koare is e sprung’n. Opvallend is det het Hoolter CDA lid ôk tèèg’n is. Zô blief ie môôi ôônder de radar. Gemeentebelang, het bint àmoa Riesner, vaste klèèft an het pluus? De Hoolter möt het àmoa sloek’n. De ofrekkening kan neet eerder kômm’n as in tweiduuzend achttiene. Mà Hoolter onthôôlt dan ôk good woet oene stemme het beste tut zien rech kump. Doar bint ôk Riessender diet op zundag wilt winkeln. At ze noar Hoolt’n trekt, raakt det de Riessense midd’nstàànd rechtstreeks in de knippe. Loat ze det gebuur’n? Het belangriekste is, duudelijk kiez’n vuur die frakties, diet doar ech een punt van maakt. In disse tied van vèèr’ntwintig uurs economie, möj’ ààndersdèènkenden de ruumte gèèm’n um op zundag te könn’n winkeln. Àmoa bedàànkt.
De Vèèrkàànte Viefkop.

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.