• Leven in Holten
  • Contact
  • Leven in Holten
  • Contact

Mark van’ Schreur op de Olympische Speel’n.

0
GEDEELD

Ôônze jeugd is enthousiast oaver het schaats’n. Zie hebt wier könn’ preum’n van het ôôlderwetse ies op ’n Noordpool. Het dôôit hard en de schnèè is vôt, mà de Olympische Winterspeel’n, stoat nog vuur de duure. Wiej hebt oaver’n paar wekke wier hèèl wat te kiek’n. Ôônze Mark geet ne medaille winn’n en gen ne vetleer’n, mà nen ech’n Olympisch’n. Woer möw we trouw’ns hen, at te wint. Het klinkt àmoal een betje vuurbarig, mar ie könt oe toch neet vuurstell’n det te wördt e huldigt op het gemeentehuus in Riess’n. Nôh ja, det mag wal, at te èèrs mar in Hoolt’n kump. Zô is ‘t toch, èèrs ne huldiging in Hoolt’n en at te dan nog zin hef, kanne altied nog zèum’n kilometer veerderop op herhaling. Zeej’t à vuur oe, Mark op nen ôôlderwetse platte boer’nwaag’n duur Hoolt’n, met nèèngduuz’nd Hoolter der umme hen. Televisie der biej en Freddy vuur de foto’s en de radio. Mèuier kan ’t neet.Mark hef in Hoolt’n ne grôôte supportersclub en die zölt doar noe ôk à wà drôk met gangs weer. Wiej bint in Hoolt’n neet dikke bezèèit met grôôte zaal’n, dus zöw we wà biej de Kandelaar trechte kômm’n. Een gemeentehuus heiw we neet meer en het kultuurhuus is nog neet kloar. Kultuurhuus, wat ne naam. Doar möw we ech nen ààndern naam vuur bedèènk’n. Doar is nog tied um wat te bedèènk’n. Doot àmoal oe beste, stuurt oen’ zelf bedach’n naam in. Misschien köw we de lèu, diet doar met gangs bint, wakker schudd’n, zôdet ter ne goei’n naam kump op’n gèèvel van het ôôle nieje gemeentehuus. Loaw we neet ofdwaal’n en ôôns hôôld’n biej den Olympischen medaille, dent Mark vuur zichzelf en Hoolt’n geet winn’. Noe heffe der à wal ééne, mà den hebt ze met eur vèèr’n e wunn’. Wiej doemt vuur ‘m, det te der noe ééne wint, dent hèèmoal allèène van ’m zelf is. Ik heb ter een een good geveul biej. Ik zeej ‘m goa oaver’n Noordpool, beentje oaver. Hij geet hoe langer oe harder. Aj’ doar in de buchte in de beene könt bliem’n, möt det in Vancouver ôk lukk’n. Wiej goat àmoal, met oe, vuur den één’ medaille en nemt mar an det hèèl Hoolt’n en umstreek’n met oe met schaatst. Wiej bint à allemachtig grèuts op oe. Ze völle heij’ in oe lèèm’n à wal e wunn’. Den één’ Olympisch’n den kump ter en zô neet, dan blif ‘n Hoolter toor’n ech wà stoan en blief ie vuur ôôns gewoon, Mark van’ Schreur, de beste schaatser diet Hoolt’n ôôit hef e had. Ie könt neet meer doo as oe beste en zô is det. Wis en waarachtig.

De Vèèrkàànte Viefkop.
 

Nieuwste berichten

De Vèèrkàànte Viefkop

De Vèèrkàànte Viefkop schrijft wekelijks een column op HoltensNieuws.nl. Hij neemt de politiek kritisch onder de loep, vertelt over zijn jeugdbelevenissen en laat zijn fantasie de vrije loop om (mis)toestanden aan de kaak te stellen. Soms is hij mild, dan weer scherp.

Welkom!

Inloggen met je account

Maak een nieuw account aan

Vul onderstaande gegevens in

Achterhaal je wachtwoord

Geef je gebruikersnaam of email adres in om je wachtwoord te resetten.