Keunedarpers van het joar

Wie zôl det word’n? Het blif nog èèm’n de grôôte vroage. Dit joar zöw we ’t vrog wèèt’n. Begin februari is ’t à carnaval en trek de optoch wier duur Hoolt’n. Het is vuur al die bouwers te hopp’n det het redelijk weer is. Mèèstal völt het wà met, mar eens in de zôvölle joar kan de giezel zô mà dikke op de waag’ns zitt’n. Röstig ofwach’n en neet zenuwachtig word’n. Èèrs ankommenden zoaterdag noar de Poppe um te zeen wiet er Kèunedarper van het joar wördt. De senatoor’n hebt e kèuz’n. Wie wördt de opvolger van de Hoevelaakjes. Doar is den oamd trouwens völle meer te bekiek’n en te belustern. Stammie zal vermoedelijk wier scharp uut ’n hook kômm’n. Prins Poemba en de Road van Elme zit noe à met kromme tèèntjes. Trouwens neet allèène an de Road van Elme, ôk an de leu uut de Road van Hoolt’n-Riess’n kan, zô links en rechts, ne schààmpert uut e deelt word’n. De Road van Hoolt’n-Riess’n wördt in meert ôk wier opniejs e kèuz’n. Àj’ duur Hoolt’n riedt zeej’ links en rechts à posters met lèu, diet zich verkiesbaar stelt. Nieje jonge kandidaat’n en nog meer kèuze as vuur vèèr joar trugge. Één dinge steet as ne poal boam’n water, àj’ wat wilt verààndern, zöj’ hen stemm’n mönn’n. Doar is de ofgelôôp’n vèèr joar völle gebuurd en det zal de kômmende vèèr joar ôk zô weer. Ôônze roadsleed’n wèèt van anpakk’n. Zie hôôlt zich an de dinge diet of esprökk’n bint en doar stoat ze vuur. Één van de heete hangiezers biej de verkiezing’n, zal het lös weer van de winkels in Hoolt’n wèè. De mèining’n van de pertiën bint inmiddels wà duudelijk. Loat oe heur’n, want noa meert wordt er opniejs ôônderhààndeld vuur vèèr joar. Nemt van miej an det de lèu in Riess’n àmoa noar de stembusse goat. Àj’ ne stèèvige voes wilt maak’n zöw we det in Hoolt’n ôk mönn’n. Netuurlijk neet allèène vuur die winkeltied’n, mar op alle gebied’n, woet Hoolt’n toch net iets ààns in mekaa zit dan Riess’n. Dus ankommmenden zoaterdag, èèrs lekker gezellig met mekaa noar de Poppe um te geniet’n van de nieje Keunedarper en het optreed’n van al die ààndere artiest’n. Doarnoa köj’ der kràànt’n nog wal is op noasloan, wat vuur oe ’n best’n Hoolter is um op te stemm’n in de Road. De vrouwlèu könt zich neet verschuul’n, doar stoat meerdere Hoolter vroole op de liest’n. Ôk al stoat ze hôôge of minder hôôge, met vuurkeurstemm’n köj’ ôk word’n e kèuz’n. Alle wiesheid en starkte straks in het stemhukske en àmoa tut kiek bie de Poppe. Kèunedarpers en Hoolter goat hen stemm’n, wis en waarachtig.
De Vèèrkàànte Viefkop

CarnavalFienpreuversHoltenHoltens Nieuws
Reacties (0)
Geef Reactie